راولپنڈی: آرمی چیف آف اسٹاف جنرل قمر جاوید باجوہ نے کہا ہے کہ کچھ لوگ باہر اور اندر سے پاکستان کی سالمیت کے درپے ہیں، فاٹا میں امن بحال ہوئے ابھی کچھ ہی دن گزرے تھے کہ کچھ لوگوں نے نئی تحریک شروع کردی۔
ان خیالات کا اظہار انہوں نے جی ایچ کیو میں منعقدہ مادروطن کے لیے قربانیاں دینے والےشہداکےاعزازمیں تقریب سے خطاب کرتے ہوئے کیا، جنرل قمر جاوید باجوہ کا کہنا تھا کہ مادر وطن کیلئے جانیں نچھاور کرنے والوں کو خراج عقیدت اور شہداکی ماؤں کوسلام پیش کرتا ہوں۔
اُن کا کہنا تھا مادر ورطن کے لیے زندگی داؤ پر لگانے والے شہداء ہی ہمارے اصل ہیروز ہیں اور ملک کا امن انہی کی مرہون منت ہے، جوقومیں اپنے ہیروز کو فراموش کردیں وہ مٹ جاتی ہیں اس لیے ہم شہدا کے لواحقین کا بھرپور خیال رکھنے کی پوری کوشش کررہےہیں۔
مزید پڑھیں: جی ایچ کیو: مادر وطن کیلئے قربانیاں دینے والےشہدا کےاعزازمیں تقریب
سپہ سالار کا کہنا تھا کہ شہداء اور غازیوں کی قربانیوں کی وجہ سے آج ہم ترقی کی طرف گامزن ہیں، پاکستان نے دہشت گردوں کو اٹھا کر باہر پھینک دیا اور اب ملک آہستہ آہستہ امن و ترقی کی طرف جارہا ہے۔
آرمی چیف کا کہنا تھا کہ پاکستان مشکل حالات سے باہر نکل چکا اس کے باوجود کچھ لوگ ملک کی سالمیت کے درپے ہیں، جب تک فوج کے پیچھے قوم کھڑی ہے ملک کی حفاظت کو یقینی بنائیں گے کیونکہ پاک فوج د نیاکی بہترین فوج ہے اور ہم شہداء کی وجہ سے ہی امن حاصل کررہے ہیں۔
اُن کا مزید کہنا تھا کہ کچھ لوگ باہر اور اندر سے پاکستان کے خلاف سازش کررہے ہیں، فاٹا میں ابھی امن بحال ہوئےکچھ دن ہی گزرےکہ کچھ لوگوں نے نئی تحریک شروع کردی۔
