بھارت کی ریاست آندھرا پردیش میں لوک سبھا انتخابات میں سفاک بیٹے نے صرف اس لیے اپنی ماں کو قتل کر دیا کیونکہ مقتولہ نے اس کی ناپسندیدہ جماعت کو ووٹ دیا۔
میڈیا رپورٹس کے مطابق مقتولہ کی شناخت 45 سالہ وڈے سنکماں کے نام سے ہوئی جو ضلع اننت پور کی رہائشی تھیں۔ انہوں نے لوک سبھا انتخابات میں وائی ایس آر کانگریس کے امیدوار کی حمایت میں ووٹ کاسٹ کیا تھا۔
ملزم وینکٹش کو جب معلوم ہوا کہ اس کی والدہ نے وائی ایس آر کانگریس کے امیدوار کو ووٹ دیا ہے تو وہ طیش میں آگیا۔ ملزم تلگو دیشم جماعت کا حامی ہے اور اس کی انتخابی مہم میں بھی حصہ لیا تھا۔
وینکٹش نے گھر پہنچ کر نہ صرف ماں سے تلخ کلامی کی بلکہ جھگڑے کے دوران ہتھوڑا کے پے در پے وار سے مقتولہ کو ہلاک کیا اور گرفتاری سے بچنے کیلیے فرار ہوگیا۔
پولیس پڑوسی کی اطلاع پر مقتولہ کے گھر پہنچی اور لاش کو پوسٹ مارٹم کیلیے اسپتال منتقل کیا۔ پولیس نے سفاک بیٹے کے خلاف قتل کا مقدمہ درج کرنے کے بعد اس کی تلاش شروع کر دی۔
