بالی ووڈ اسٹار سونو سود کی زخمی نوجوان کی مدد کرنے کی ویڈیو سوشل میڈیا پر وائرل ہوگئی۔
بھارتی میڈیا کی رپورٹ کے مطابق بالی ووڈ اداکار سونو سود کی انسٹاگرام ویڈیو وائرل ہورہی ہے جس میں وہ بھارتی پنجاب کے علاقے میں ایک زخمی نوجوان کی مدد کررہے ہیں۔
سونو سود موگا کے ایک پُل سے اپنی گاڑی میں گزر رہے تھے کہ انہوں نے وہاں حادثے کا شکار ہونے والی گاڑی کو دیکھا جس میں ایک نوجوان بھی موجود تھا۔
Every Life Counts 🙏@SonuSood pic.twitter.com/veu5M6fcqU
— Sood Charity Foundation (@SoodFoundation) February 9, 2022
اداکار نے یہ دیکھتے ہی اپنی گاڑی روکی اور فوری طور پر متاثرہ گاڑی کی جانب بڑھے جس میں 19 سالہ نوجوان زخمی حالت میں ڈرائیونگ سیٹ پر نیم بیہوشی کی حالت میں تھا۔
اس موقع پر سونو سود نے کچھ لوگوں کی مدد سے لڑکے کو گاڑی سے باہر نکالا اور پھر اپنی گاڑی میں ڈال کر فوری اسپتال پہنچایا جہاں زخمی نوجوان کو طبی امداد فراہم کی گئی۔
یاد رہے کہ بھارت میں کووڈ کے دنوں میں سونو سود نے بہت سے ضرورت مندوں کی مدد کی اور انہیں آکسیجن سلینڈر سمیت مالی امداد بھی دی۔
