کرکٹ جنوبی افریقہ نے خواتین کرکٹرز کو مرد کرکٹرز کے برابر معاوضہ دینے کا اعلان کردیا ہے۔
کرکٹ جنوبی افریقہ کی جانب سے یہ فیصلہ سامنے آنے کے بعد خواتین اور مرد کرکٹرز انٹرنیشنل میچز کی یکساں میچ فیس وصول کریں گے۔
خواتین کرکٹرز کا معاوضہ عام طور پر مرد کرکٹرز سے کافی کم ہوتا ہے، لیکن جنوبی افریقا، نیوزی لینڈ اور بھارت کے بعد تیسرا ملک ہے جس نے مرد اور خواتین کرکٹرز دونوں کو برابر معاوضہ دینے کی ٹھان لی ہے۔
کرکٹ جنوبی افریقا کے سی ای او فولیٹسی موسیکی نے کہا ہے یکساں معاوضوں کا اعلان ایک اہم قدم ہے جس سے ملک میں خواتین کرکٹ کو مزید فروغ ملے گا اور خواتین کرکٹرز کے لئے آسانیاں پیدا ہوں گی۔
یاد رہے کہ گزشتہ برسوں کے دوران ساتھ افریقن ویمنز کرکٹ ٹیم نے بہترین کھیل کا مظاہرہ کیا ہے، ساؤتھ افریقن ویمن ٹیم نے گزشتہ سال نیوزی لینڈ میں ہونے والے آئی سی سی ویمنز کرکٹ ورلڈکپ کے سیمی فائنل میں بھی رسائی حال کی تھی۔
جبکہ جنوبی افریقا کی ویمنز کرکٹ ٹیم رواں سال آئی سی سی ٹی ٹوئنٹی ورلڈکپ میں پہلی بار فائنل میں پہنچی تھی، لیکن فائنل میں اسے آسٹریلیا کے ہاتھوں شکست ہوئی تھی۔
