سیئول: حقیقی جرم کرنے کے جنون میں مبتلا خاتون نے دوسری خاتون کو قتل کرکے لاش کے ٹکڑے ٹکڑے کرڈالے۔
غیر ملکی میڈیا رپورٹ کے مطابق جنوبی کوریا کے شہر بوسان میں پولیس نے ایک خاتون کو دوسری خاتون کے قتل کے الزام میں گرفتار کیا تو ملزمہ نے نہ صرف اعتراف جرم کیا بلکہ خاتون کو قتل کرنے کی لرزہ خیز داستان بھی سناڈالی۔
پولیس کے مطابق تئیس سالہ جنگ یو جنگ نامی خاتون نے حقیقی جرم کرنے کے جنون میں مبتلا ہوکر یہ انتہائی قدم اٹھایا، پولیس نے بتایا کہ ملزمہ کے دل میں ٹی وی پروگراموں اور کتابوں سے قتل کے جنون میں مبتلا ہونے کے بعد کسی کو حقیقت میں قتل کرنے کی خواہش پیدا ہوئی۔
پولیس نے کہا کہ جنگ کی فون کی سرچ ہسٹری سے پتہ چلتا ہے کہ لاش کو چھپانے کے طریقے کے بارے میں تین ماہ تک معلومات اکٹھی کی گئیں۔
دلخراش واقعے سے متعلق ایک مقامی اخبار نے رپورٹ کیا کہ ملزمہ نے مبینہ طور پر متعدد ’رئیل کرائم ٹی وی شوز‘ دیکھے اور ایک لائبریری سے جرائم کی کتابیں بھی حاصل کیں۔
خاتون کا طریقہ واردات
جرم کرنے کے جنون میں مبتلا خاتون نے اپنے شکار کو ایک ایسی ایپ کے ذریعے تلاش کیا جو والدین کے نجی ٹیوٹرز کے ساتھ رابطے کے لیے بنائی گئی ہے۔ مذکورہ خاتون نے متاثرہ خاتون کے ساتھ اپنا تعارف نویں جماعت کی طالبہ کی ماں کی حیثت سے کروایا۔
رپورٹ میں بتایا گیا کہ ملزمہ مبینہ طور پر اسکول کا یونیفارم پہنے طالب علم کے بھیس میں متاثرہ لڑکی سے ملنے گئیں اور ان پرتیز دھار آلے سے جان لیوا حملہ کیا۔
خاتون کو قتل کرنے کے بعد اس کی لاش کے ٹکڑے ٹکڑے کر دیئے اور ان کے جسم کے کچھ حصوں کو سوٹ کیس میں رکھنے کے بعد ٹیکسی میں رکھ کر اپنے گھر چل دیں لاش کے باقی ماندہ حصے کو جنگ نے دریائے ناکڈونگ میں پھینک دیا تاکہ ’ایسا نظر آئے کہ شکار غائب ہو گیا۔
حکام کے بقول پانچ سال قبل ہائی اسکول سے گریجویشن کرنے کے بعد سے جنگ تنہا اور الگ تھلگ رہتی تھیں وہ بے روزگار تھیں۔
