تہران: ایران نے ماحولیاتی آلودگی کے جرم میں جنوبی کوریا کے جھنڈے والا جہاز پکڑ لیا، جب کہ جنوبی کوریا نے ایران سے بحری جہاز فوری طور پر چھوڑنے کا مطالبہ کر دیا ہے۔
غیر ملکی میڈیا کے مطابق ایران کی سپاہ پاسداران انقلاب کی بحریہ نے خلیج فارس میں جنوبی کوریا کا پرچم لگا کر چلنے والی بحری کشتی کو ماحولیات کو آلودہ کرنے کے جرم میں قبضے میں لے لیا ہے۔
ایران کا کہنا ہے کہ جنوبی کوریا کی کشتی نے عالمی قوانین اور پروٹوکول کی خلاف ورزی کی ہے۔
پاسداران انقلاب کی بحریہ کی جانب سے یہ کارروائی عالمی قوانین کی خلاف ورزی پر کی گئی، ایران نے جنوبی کورین کشتی پکڑ کر ایک بندرگاہ پر لنگر انداز کر دی ہے۔
اطلاعات کے مطابق جنوبی کورین کشتی کا نام ہانکوک چیمی ہے جس پر 7 ہزار 200 ٹن کیمیائی تیل لدا ہوا ہے، جب کہ کشتی پر موجود افراد کا تعلق جنوبی کوریا، انڈونیشیا، ویت نام اور میانمار سے بتایا گیا ہے۔
ایرانی سپاہ نے میری ٹائم آرگنائزیشن کی درخواست اور صوبہ ہرمزگان کے پراسیکیوٹر کے حکم پر کشتی کو پکڑ کر ایرانی بندرگاہ پر لنگر انداز کروا دی۔
سیئول نے بھی عمان کے سمندر میں ایرانی حکام کے ذریعے جنوبی کوریائی کیمیاوی ٹینکر کے قبضے کی تصدیق کی ہے اور ایران سے اسے فوری طور پر چھوڑنے کا مطالبہ بھی کیا ہے۔
واضح رہے کہ ایران کی جانب سے یہ کارروائی ایک ایسے وقت ہوئی ہے جب امریکی پابندیوں کی وجہ سے جنوبی کوریائی بینکوں میں ایرانی فنڈز منجمد ہونے پر تہران اور سیئول کے مابین کشیدگی ہے۔
