میڈرڈ: آپ کو یہ جان کر حیرت ہوگی کہ اسپین میں اب پیدل چلنے والے بھی بھاری جرمانہ ادا کریں گے۔
تفصیلات کے مطابق اسپین میں سڑکوں پر غلط طریقے سے پیدل چلنے والوں کو محکمہ ٹریفک کی جانب سے 1,000 یورو تک کا جرمانہ کیا جا سکتا ہے۔
جنرل ڈائریکٹوریٹ آف ٹریفک کا کہنا ہے کہ پیدل چلنے والوں کو بھی ٹریفک اور روڈ سیفٹی قانون کے ضوابط کی تعمیل کرنی ہوگی، اور قانون کی تعمیل کی ناکامی کی صورت میں محکمے کی جانب سے ہزار یورو تک کا جرمانہ ہو سکتا ہے۔
محکمے نے پیدل چلنے والے افراد کی تعریف بھی متعین کی ہے، ٹریفک اور روڈ سیفٹی قانون کے مطابق پیدل چلنے والا شخص وہ ہے جو ڈرائیور نہیں ہے، اور جو عوامی سڑکوں پر پیدل سفر کرتا ہے۔
ہسپانوی محکمہ ٹریفک کے مطابق مندرجہ ذیل صورتوں میں پیدل چلنے والوں کو جرمانے کا سامنا کرنا پڑ سکتا ہے۔
زیبرا کراسنگ استعمال کیے بغیر سڑک پار کرنا، موٹر وے یا دوہری کیریج ویز پر چلنا، پیدل چلنے والوں کے لیے موٹر ویز یا دوہری کیریج ویز پر چلنے کی سختی سے ممانعت ہے، اس کی اجازت صرف خاص حالات میں ہے۔
چمک دار بنیان نہ پہننا، موٹر ویز یا دوہری کیریج ویز پر چمک دار بنیان پہننا لازمی ہے، رہائشی علاقوں سے باہر سڑک کے بائیں جانب نہ چلنا، اس کی وجہ یہ ہے کہ اس طرح وہ آگے سے آنے والی گاڑیوں کو دیکھ سکیں گے، اگر کوئی پیدل چلنے والا دائیں طرف چلتا ہے تو پیچھے سے آنے والی گاڑیوں کے خطرے کا ادراک کرنا مشکل ہو جاتا ہے۔
ٹریفک لائٹ سرخ ہونے پر سڑک کراس کرنا، جب کوئی ڈرائیور سرخ ٹریفک لائٹ دیکھتا ہے، تو اس کا مطلب ہے کہ اسے رک کر انتظار کرنا چاہیے۔ یہی اصول پیدل چلنے والوں پر بھی لاگو ہوتا ہے۔
الکحل یا منشیات کے لیے ٹیسٹ کروانے سے انکار، کیوں کہ صرف ڈرائیور ہی نہیں بلکہ یہ اصول پیدل چلنے والوں پر بھی لاگو ہوتا ہے، اگر وہ کسی حادثے میں ملوث ہوتے ہیں یا کوئی جرم کرتے ہیں، ان صورتوں میں الکحل یا منشیات کے لیے ٹیسٹ کروانے سے انکار کرنے پر جرمانہ ہو سکتا ہے۔
