واشنگٹن: اسپیکر مک کارتھی نے امریکی صدر جو بائیڈن کے مواخذے کی دھمکی دے دی ہے۔
تفصیلات کے مطابق امریکی صدر جو بائیڈن کے بیٹے ہنٹر بائیڈن کے معاملے پر ریپبلکنز کا غصہ بڑھتا جا رہا ہے، اور ان کی جانب سے جو بائیڈن پر الزام لگایا جا رہا ہے کہ انھوں نے نائب صدارت کے دوران اپنے بیٹے ہنٹر کو فائدہ پہنچایا۔
ریپبلکنز کا کہنا ہے کہ جس طرح سابق صدر ڈونلڈ ٹرمپ کے ساتھ رویہ اختیار کیا گیا، اس طرح ہنٹر بائیڈن کے ساتھ نہیں اختیار کیا گیا، یہی وجہ ہے کہ اسپیکر مک کارتھی نے اب کہا ہے کہ ہنٹر بائیڈن کے معاملے میں سچائی تک پہنچنے کا واحد راستہ صدر کا مواخذہ ہے۔
اسپیکر نے کہا امریکی عوام بزنس ڈیلز میں بائیڈن کے کردار سے متعلق جاننا چاہتی ہے، واضح رہے کہ صدر بائیڈن کے بیٹے ہنٹر بائیڈن کی بزنس ڈیلز سے متعلق تحقیقات جاری ہیں، ریپبلکنز کا کہنا ہے کہ نائب صدارت کے دوران بائیڈن نے بیٹے کو فائدہ پہنچایا تھا۔
مک کارتھی نے یہ بھی کہا ہے کہ ہنٹر بائیڈن کو الیکشن کے دوران بھی فائدہ پہنچایا گیا تھا، اور جو بائیڈن کے امریکی صدر بننے کے بعد بھی وہ مسلسل مالی فوائد حاصل کرتے رہے ہیں۔
