پنجاب اسمبلی کے 26 اپوزیشن ارکان کے خلاف نااہلی ریفرنس الیکشن کمیشن بھیجنے پر چند سینئر (ن) لیگی رہنما اسپیکر ملک محمد احمد خان سے ناخوش ہیں۔
اے آر وائی نیوز کو ذرائع نے بتایا کہ اسپیکر صوبائی اسمبلی ملک محمد احمد خان کی چیف الیکشن کمشنر سکندر سلطان راجہ سے ملاقات پر بھی (ن) لیگی رہنماؤں کو اعتراض ہے۔
ذرائع نے بتایا کہ سینئر (ن) لیگی رہنماؤں نے پارٹی قیادت سے ملک محمد احمد خان کے کنڈکٹ پر ناپسندیدگی کا اظہار کرتے ہوئے کہا کہ ہلڑ بازی اور شور شرابے پر ارکان کی معطلی ایوان میں داخلے پر پابندی تک رہنی چاہیے تھی۔
یہ بھی پڑھیں: پنجاب اسمبلی میں معطل اپوزیشن ارکان نئی مشکل میں پھنس گئے
(ن) لیگی رہنماؤں نے کہا کہ اپوزیشن کے ان ارکان کا طرز عمل ناقابل قبول ہے لیکن نااہلی بڑا قدم ہوگا، اسپیکر صوبائی اسمبلی کا چیف الیکشن کمشنر سے ملنا اور نااہلی ریفرنس غیر ضروری ہے۔
3 جولائی 2025 کو اپوزیشن جماعت سنی اتحاد کونسل کے 26 ارکان پنجاب اسمبلی کے خلاف الیکشن کمیشن میں نااہلی ریفرنس دائر کیا گیا تھا۔
اسپیکر پنجاب اسمبلی ملک محمد احمد خان الیکشن کمیشن پہنچے تھے جہاں انہوں نے 26 اپوزیشن ارکان کے خلاف نااہلی ریفرنس دائر کیے۔
واضح رہے کہ پنجاب اسمبلی میں وزیر اعلیٰ مریم نواز کی تقریب کے دوران ہنگامہ آرائی کرنے پر اپوزیشن کے 26 ارکان کو معطل کیا گیا تھا۔
28 جون کو اسپیکر ملک محمد احمد خان نے معطل کیے گئے ارکان کے خلاف ریفرنس الیکشن کمیشن بھجوانے کا اعلان کیا تھا۔
ملک محمد احمد خان نے پریس کانفرنس میں کہا تھا کہ معطل پی ٹی آئی ارکان کے خلاف ریفرنس الیکشن کمیشن کو بھجواؤں گا، اپوزیشن ارکان اپنے لیڈر کی بات نہیں سنتے تو آئین مجھے حق دیتا ہے ریفرنس بھجواؤں، سابق چیف جسٹس پاکستان عمر عطا بندیال کا اس ضمن میں فیصلہ بالکل واضح ہے۔
