دنیا بھر میں مقبولیت کے ریکارڈز توڑنے والی جنوبی کورین سیریز اسکوئڈ گیم کے دوسرے سیزن کی نومبر میں ریلیز کا اعلان کردیا گیا تاہم حتمی تاریخ ابھی بھی نہیں بتائی گئی۔
سنہ 2021 کے اواخر میں نیٹ فلکس پر چھا جانے والی کورین سیریز اسکوئڈ گیم کا دوسرا سیزن شوٹنگ کے آخری مراحل میں ہے۔
نیٹ فلکس کی جانب سے اعلان کیا گیا ہے کہ ڈرامہ اور سسپنس سے بھرپور سیریز اسکوئڈ گیم کا سیزن 2 نومبر میں ریلیز کیا جائے گا۔
دوسرے سیزن میں 466 شرکا گیم میں حصہ لیں گے اور جیتنے والا شخص 45 لاکھ 60 ہزار ڈالر کی رقم حاصل کر سکے گا۔
یہ بھی کہا جارہا ہے کہ پچھلے سیزن کی اسٹوری لائن پر تنقید کی وجہ سے اب نئے سیزن میں یہ تبدیلی کی جارہی ہے کہ کھیل میں ہارنے والوں کو مرتے ہوئے نہیں دکھایا جائے گا۔
لیکن اس کے باوجود دکھائے جانے والے کھیل نہایت خطرناک اور سسپنس سے بھرپور ہوں گے۔
اسکوئڈ گیم کے سیزن 1 میں قرض میں ڈوبے لوگوں کو مجبوری کے عالم میں ایک ایسے کھیل کا حصہ دکھایا گیا تھا جس میں سینکڑوں افراد کو پیسے کا لالچ دے کر مختلف کھیل کھلائے جاتے ہیں اور ہارنے والا زندگی کی بازی ہار جاتا ہے۔
اسکوئڈ گیم میں اداکاری کے جوہر دکھانے والے اداکار او یونگ سو کو ان کی اداکاری پر گولڈن گلوب ایوارڈ بھی دیا گیا جس کے بعد وہ یہ ایوارڈ جیتنے والے پہلے کورین اداکار بن گئے ہیں۔