اسلام آباد: وزیر اعظم شہباز شریف کی دعوت پر ملائیشیا کے وزیر اعظم داتو سری انور ابراہیم 3 روزہ سرکاری دورے پر پاکستان پہنچ گئے۔
اے پی پی کے مطابق وزیر اعظم ملائیشیا انور ابراہیم کے اسلام آباد پہنچنے پر پاک فوج کے چاق و چوبند دستے نے سلامی دی جبکہ 21 توپوں کی سلامی بھی دی گئی۔
روایتی لباس میں ملبوس بچوں نے ملائیشیا کے وزیر اعظم کو پھول پیش کی۔ نائب وزیر اعظم و وزیر خارجہ اسحاق ڈار، وزیر کامرس جام کمال خان اور وزیر اطلاعات و نشریات عطا اللہ تارڑ بھی شہباز شریف کے ہمراہ استقبال میں شریک تھے۔
داتو سری انور ابراہیم دورے کے دوران وزیر اعظم شہباز شریف اور صدر مملکت آصف علی زرداری سے ملاقات کریں گے جبکہ ان کے دورے کے دوران پاکستان ملائیشیا دو طرفہ تعاون کے فروغ پر گفتگو اور دونوں ممالک کے مابین شراکت کے حوالے سے اہم پیش رفت ہوگی۔
داتو سری انور ابراہیم کے ہمراہ اعلیٰ سطح کا کاروباری شخصیات و سرمایہ کاروں کا وفد بھی پاکستان آیا ہے جو پاکستانی کاروباری شخصیات و سرمایہ کاروں سے ملاقات کرے گا جس سے دونوں ممالک کے مابین تجارت و سرمایہ کاری کو فروغ ملے گا۔
دونوں ممالک کے مابین تجارت و سرمایہ کاری میں تعاون کیلیے ملائیشیا کے وزیر اعظم پاکستان ملائیشیا بزنس فورم میں شرکت بھی کریں گے۔
