لاہور: پنجاب میں اسٹینڈرڈ نمبر پلیٹس کا اجرا کردیا گیا، نمبر پلیٹس کی بکنگ کے لیے محکمہ ایکسائز پنجاب کی ویب سائٹ پر رجسٹریشن کروائی جاسکتی ہے۔
تفصیلات کے مطابق محکمہ ایکسائز پنجاب نے اسٹینڈرڈ نمبر پلیٹس کا اجرا کردیا، آزمائشی نمبر پلیٹس کا اجرا اگلے ہفتے سے ہوگا۔
صوبائی وزیر ایکسائز و ٹیکسیشن حافظ ممتاز احمد کا کہنا ہے کہ مستقل بنیادوں پر نمبر پلیٹس کا اجرا مارچ کے آخری ہفتے سے ہوگا، نمبر پلیٹس کی بکنگ کے لیے آج ہی محکمہ ایکسائز کی ویب سائٹ پر رجسٹریشن کروائیں۔
انہوں نے کہا کہ پہلے رجسٹریشن کروانے والے صارفین کو ترجیحی بنیادوں پر نمبر پلیٹس کا اجرا کیا جائے گا، جن گاڑیوں کی نمبر پلٹس تیار ہوں گی ان کی وصولی کی تاریخ، وقت اور مقام کی اطلاع بذریعہ ایس ایم ایس بھی کی جائے گی۔
صوبائی وزیر کا کہنا تھا کہ وزیر اعلیٰ پنجاب سردار عثمان بزدار اور نیشنل ریڈیو اینڈ کمیونیکیشن کی خصوصی کاوشوں سے نمبر پلیٹس کی فراہمی ممکن بنانے میں کامیاب ہوسکے۔
انہوں نے کہا کہ سابقہ حکومت کی نااہلی کی وجہ سے صارفین کو نمبر پلیٹس کے لیے انتظار کرنا پڑا، ہم نے دن رات ایک کر کے عوام کو نمبر پلیٹس کی فراہمی کو ممکن بنایا۔
صوبائی وزیر کے مطابق محکمہ ایکسائز پنجاب سب سے زیادہ جدید ٹیکنالوجی استعمال کرنے والا محکمہ بن چکا ہے، عوام گھر بیٹھے ایکسائز پنجاب کی سہولیات سے مستفید ہو رہے ہیں۔
انہوں نے مزید کہا کہ یونیورسل نمبر پلیٹس کا اجرا تحریک انصاف حکومت کا شاہکار منصوبہ ہے، وزیر اعظم عمران خان اور وزیر اعلیٰ پنجاب سردار عثمان بزدار کے وژن کے مطابق ایکسائز پنجاب میں تبدیلی اور جدت لے کر آئے ہیں۔