ایڈنبرگ : جمہوریہ آئرلینڈ میں ’علی‘ نامی طوفان کی زد میں آکر ایک خاتون ہلاک ہوگئی، جبکہ 2 لاکھ سے زائد گھر بجلی سے محروم ہوگئے۔
تفصیلات کے مطابق طوفان کی زد میں آکر ہلاک ہونے والی خاتون اپنے کچھ دوستوں کے ہمراہ سیاحت کی غرض سے آئی تھی، جو ساحل پر اپنی گاڑی میں آرام کر رہی تھی اور طوفان کی لپیٹ میں آگئی۔
محکمہ موسمیات نے بدھ کے روز 80 میل فی گھنٹہ رفتار سے چلنے والے طوفان کی پیشگوئی کرتے ہوئے وارننگ جاری کی تھی۔
محکمہ موسمیات کا کہنا ہے کہ طوفان کے باعث فضائی آمد و رفت معطل ہوگئی ہے اور شدید طوفان کی وجہ سے اڑتی ہوئی چیزوں سے لوگوں کے زخمی ہونے یا جان جانے کا بھی خطرہ ہے۔
برطانوی محکمہ موسمیات نے شمالی انگلینڈ، اسکاٹ لینڈ اور آئر لینڈ کے لیے وارننگ جاری کرتے ہوئے کہا ہے کہ عمارتوں کو نقصان پہنچنے اور درخت وغیرہ گرنے کا خدشہ بھی موجود ہے۔
طوفان کی آمد کے ساتھ ہی شمالی آئر لینڈ میں بجلی کی فراہمی بھی معطل ہوگئی ہے جبکہ دیگر جہگوں پر بجلی کی فراہمی معطل ہونے کا خطرہ ہے جس کے بعد دیگر سروسز جیسے موبائل فون سروس وغیرہ بھی متاثر ہوسکتی ہے۔
آئر لیند کے صدر مائیکل ڈی ہیگن نے طوفان کی زد میں آکر ہلاک ہونے خاتون کی موت پر افسوس کا اظہار کرتے ہوئے خاتون سے اظہار ہمدردی کیا۔
Very strong winds and heavy rain will reach Northern Ireland and parts of Scotland during Wednesday. @MetEireann and @metoffice have just jointly named this system "Storm Ali”. Warnings will be updated later this morning. #StormAli pic.twitter.com/UIBCl5vmcw
— Met Office (@metoffice) September 18, 2018
خیال رہے کہ اس وقت مختلف براعظموں میں مختلف ممالک طوفانوں کی زد میں ہیں۔
گزشتہ روز مینگ کھٹ نامی خطرناک سمندری طوفان نے ہانگ کانگ سمیت جنوبی چین میں تباہی مچادی، طوفان کے باعث دو افراد ہلاک جبکہ سینکڑوں زخمی ہوگئے۔
