بگوٹا : کولمبیا میں ایک ایسا دلچسپ اور قابل دید مکان تعمیر کیا گیا ہے جسے دیکھ کر آپ فن تعمیر کی تعریف کیے بغیر نہ رہ سکیں گے۔
اس گھر کو اس نداز سے بنایا گیا ہے کہ دیکھنے میں الٹا نظر آتا ہے یعنی چھر پر فرش اور فرش پر چھت۔ اس گھر کے اندر جاکر دیکھیں تو وہاں بھی یہ ہی صورتحال دیکھنے میں آتی ہے۔
یہاں آنے والے سیاح اس مکان کی تعمیر دیکھ کر داد دیئے بغیر نہیں رہتے کیونکہ اندر جاکر آپ کو معلوم ہوگاکہ واقعی یہ گھر الٹا ہے اور پلنگ اوپر کی چھت سے چپکا ہوا ہے جو حقیقت میں چھت نہیں اس الٹے مکان کافرش ہے۔
اس مکان کو اسٹریا کے ڈیزائنر فرٹز شال نے بنایا ہے جو ایک عرصے سے کولمبیا میں ہی رہتے ہیں، جب انہوں نے اس انوکھے مکان بنانے کا تصور پیش کیا تو لوگوں نے اس کا بہت مذاق اڑایا لیکن وہ دھن کے پکے تھے اور مسلسل اپنے کام میں لگے رہے یہاں تک کہ مکان کی تعمیر شرمندہ تعبیر ہوگئی۔
فرٹز کے مطابق اس گھر کی بنیاد بنانا سب سے مشکل کام تھا کیونکہ جھونپٹری نما مکان کو الٹا بنانا آسان نہ تھا۔ اب کورونا وبا کے دوران لوگ یہاں آرہے ہیں اور کچھ دیر یہاں گزار کر خوش وخرم اپنے گھروں کو لوٹ رہے ہیں۔
غیر ملکی خبر رساں ادارے کی رپورٹ کے مطابق کولمبیا کے صدر مقام بوگوٹا سے چند منٹ کی مسافت پر ایک دیہات گوٹاویٹا میں یہ مکان بنایا گیا ہے جسے اپ سائیڈ ڈاؤن ہوم کا نام دیا گیا ہے۔
