کراچی: شہر قائد کے علاقے کورنگی مہران ٹاؤن میں لوٹ مار کی ایک واردات کے دوران معصوم بچے کو گولی مارنے والا اسٹریٹ کرمنل آج پولیس مقابلے میں گولی لگنے سے زخمی ہو کر گرفتار ہو گیا۔
تفصیلات کے مطابق تھانہ کورنگی انڈسٹریل ایریا پولیس کا شریف آباد قبرستان سیکٹر 6/D مہران ٹاؤن کے پاس اسٹریٹ کرمنلز سے مقابلہ ہوا، جس میں ایک ملزم کو زخمی حالت میں گرفتار کر لیا گیا۔
انسپکٹر اورنگزیب خٹک کے مطابق ملزمان نے پولیس پارٹی کو دیکھ کر فائرنگ شروع کر دی تھی، پولیس کی جوابی فائرنگ سے ایک ملزم زخمی حالت میں گرفتار جب کہ ایک ملزم فرار ہونے میں کامیاب ہو گیا۔
زخمی ملزم کی شناخت عزیز سومرو عرف وڈیرا ولد حاجی غلام سومرو کے نام سے ہوئی ہے، ملزم نے فرار ہونے والے ساتھی کا نام راجو ولد ناظم سومرو بتایا، گرفتار ملزم سے ایک پستول 30 بور مع 2 راؤنڈز برآمد ہوئے۔
زخمی ملزم نے گزشتہ دنوں مہران ٹاؤن میں دوران ڈکیتی ایک معصوم لڑکے کو ٹانگ میں گولی مارنے کا بھی انکشاف کیا، سی سی ٹی وی فوٹیج میں زخمی ملزم کو اپنے دیگر ساتھی کے ساتھ بچے کو گولی مارتے ہوئے واضح دیکھا جا سکتا ہے۔
لٹیروں نے فرار ہوتے وقت بچے پر گولی چلا دی، دل دہلا دینے والی فوٹیج
ایس ایچ او کورنگی انڈسٹریل ایریا کراچی انسپکٹر اورنگزیب خٹک نے بتایا کہ زخمی ملزم کو علاج معالجے کے لیے جناح اسپتال منتقل کر دیا گیا ہے، اور اس کا سابقہ کرمنل ریکارڈ چیک کیا جا رہا ہے۔
نذیر شاہ کراچی میں اے آر وائی نیوز سے وابستہ نمائندہ خصوصی ہیں، وہ 16 سال سے زائد عرصے سے اپنے شعبے میں مصروف عمل ہیں اور انویسٹیگیٹو نیوز بریکنگ میں مہارت رکھتے ہیں، اور کراچی کے جرائم اور پولیس نظام سے متعلق گہری سمجھ بوجھ کے حامل ہیں۔