لندن: انگلش فاسٹ بولر اسٹورٹ براڈ نے انٹرنیشنل کرکٹ سے اچانک ریٹائرمنٹ کا اعلان کر کے لوگوں کو حیران کر دیا۔
تفصیلات کے مطابق انگلینڈ کے مایہ ناز فاسٹ بولر اسٹورٹ براڈ نے جمعہ کو کرکٹ سے ریٹائرمنٹ کا اعلان کر دیا ہے، اوول میں جاری ایشیز سیریز کے پانچویں ٹیسٹ کے اختتام پر اسٹورٹ براڈ ریٹائر ہو جائیں گے، یوں ان کے 17 سالہ کیریئر کا اختتام ہو جائے گا۔
براڈ کو دوسرے کامیاب ترین ٹیسٹ فاسٹ بولر ہونے کا اعزاز حاصل ہے، اسٹورٹ براڈ 167 ٹیسٹ میچوں میں 602 وکٹیں حاصل کر چکے ہیں، انھوں نے 121 ون ڈے اور 56 ٹی ٹوئنٹی میچوں میں انگلینڈ کی نمائندگی کی۔
BREAKING 🚨: Stuart Broad announces he will retire from cricket after the Ashes ends. pic.twitter.com/dNv8EZ0qnC
— Sky Sports Cricket (@SkyCricket) July 29, 2023
براڈ نے اوول میں اپنے دیرینہ ساتھیوں جیمز اینڈرسن اور جوئے روٹ کو ہفتے کی صبح کھیلنے سے قبل اپنے فیصلے سے آگاہ کیا تھا۔
تیسرے دن کے کھیل کے اختتام پر براڈ نے اسکائی اسپورٹس کو بتایا کہ ’’یہ ایک شان دار سفر رہا، ناٹنگھم شائر اور انگلینڈ کا بیج پہننا ایک بہت بڑا اعزاز ہے، میں کرکٹ سے اب بھی اتنا ہی پیار کرتا ہوں جتنا میں نے کبھی کیا ہے۔‘‘
براڈ کا ایشیز سیریز سے متعلق کہنا تھا کہ اس کا حصہ بننا بہت ہی شان دار رہا، یہ سیریز ہمیشہ ان کے لیے بہت ہی پرلطف دل چسپ رہا ہے۔
