چینی مافیا کی عوام کیخلاف سازش عروج پر ہے، چند دن پہلے ملک بھر میں 175 روپے کلو دستیاب چینی 190 روپے کلو سے تجاوز کرچکی ہے۔
اے آر وائی نیوز کے مطابق شہرقائد میں ایک بار پھر سے چینی کی قیمتوں نے ایسی اڑان بھری ہے کہ مہنگائی میں پسے عوام کے مزید ہوش اڑ چکے ہیں، لوگ پریشان ہیں جبکہ حکومت بالکل خاموش ہے اور چینی مافیا کو کوئی پوچھنے والا نہیں ہے۔
بازار میں خریداری کے لیے آئے ایک بزرگ شہری نے کہا کہ بہت مہنگائی بڑھتی جارہی ہے چینی کی طرح 100 اشیا ایسی ہیں جس پر 20 روپے سے لے کر 50 روپے تک بڑھ چکے ہیں۔
ملک میں چینی کی فی کلو قیمت 195 روپے تک پہنچ گئی
ایک اور شہری نے بتایا کہ میں 5 کلو چینی لینے آیا تھا مگر اب ڈھائی کلو لےکر جارہا ہوں جبکہ دکاندار کا کہنا ہے کہ چینی پیچھے سے مہنگی آئے گی تو ہمارا بھی پرافٹ اوپر چلا جائے گا۔
کراچی میں چینی مافیا اس قدر سرگرم ہے کہ اس نے فی کلو پر ایک ساتھ 10 روپے بڑھا دیے ہیں، چند دن پہلے جو چینی 175 سے 178 روپے کلو تک دستیاب تھی وہ اب 190 روپے کلو سے بھی تجاوز کرتی جارہی ہے۔
عوام کا کہنا ہے کہ چینی مافیا کےخلاف موثر کارروائی کی جائے ورنہ چینی مافیا یوں ہی عوام کا خون چوستے رہیں گے۔
