اسلام آباد: وزیر اعظم پیکج کے تحت یوٹیلیٹی اسٹورز پر کئی ہفتوں سے بند چینی کی فروخت شروع ہو گئی۔
ذرائع یوٹیلیٹی اسٹورز کے مطابق اسٹورز پر گزشتہ کئی ہفتوں سے چینی کی فروخت بند تھی، تاہم اب اسٹورز کو چینی کی سپلائی کا آغاز کر دیا گیا ہے۔
ذرائع کا کہنا ہے کہ ایک سے دو روز میں ملک بھر کے اسٹورز پر چینی کی دستیابی یقینی ہو جائے گی۔
یوٹیلیٹی اسٹورز نے فی کلو 15 روپے ایف ای ڈی کی وجہ سے چینی کی فروخت بند کی تھی، تاہم اب اسٹورز اور ایف بی آر کے درمیان چینی پر ایف ای ڈی کا معاملہ حل ہو گیا ہے، یوٹیلیٹی اسٹورز پر فروخت کی حد تک چینی کی فراہمی پر ایف ای ڈی لاگو نہیں ہوگی۔
ذرائع کے مطابق یوٹیلیٹی اسٹورز نے ایف ای ڈی کی وضاحت کے لیے ایف بی آر سے ایڈوائس مانگی تھی، جس پر ایف بی آر نے کارپوریشن کو مانگی گئی ایڈوائس پر جواب دے دیا۔ یہ بھی کہا گیا ہے کہ کارپوریشن کے پاس اس وقت وافر مقدار میں چینی دستیاب ہے۔
