کراچی : شہر قائد میں سوئی گیس کا بحران شدت اختیار کرگیا، گھروں کے چولہے ٹھنڈے ہوگئے، مختلف علاقوں میں گزشتہ رات سے گیس کی فراہمی مکمل طور پر بند ہے۔
اس حوالے سے ذرائع کا کہنا ہے کہ کراچی کے بیشتر علاقوں لانڈھی 5 نمبر، نارتھ کراچی، گلستان جوہر، گلشن اقبال، نارتھ ناظم آباد میں گیس کی سپلائی بند ہے۔
اس کے علاوہ سرسید ٹاون، نیوکراچی، ناگن چورنگی، اورنگی سائٹ، ریلوے کالونی میں بھی گیس کی فراہمی معطل ہے جبکہ راشد منہاس روڈ، ایف بی ایریا، گڈاپ، کاٹھور میں گیس فراہم نہیں کی جارہی۔
سوئی گیس کی فراہمی بند ہونے سے رہائشی علاقوں کے صارفین کو کھانا پکانے میں مشکلات کا سامنا ہے، شہریوں کا مطالبہ ہے کہ سپلائی کو فوری بحال کیا جائے۔
ذرائع کے مطابق گیس کی طلب میں اضافہ کی وجہ سے سوئی سدرن گیس کمپنی کو 280ایم ایم سی ایف ڈی کی کمی کا سامنا ہے، گیس طلب 1250ایم ایم سی ایف ڈی ہے جبکہ گیس کی فراہمی 900سے 1000ایم ایم سی ایف ڈی ہے۔
