کراچی : سوئی سدرن گیس کمپنی نے گیس قلت کے پیش نظر اتوار کی صبح 8 بجے سے سی این جی اسٹیشنز کو 24 گھنٹے کیلیے سپلائی معطل کرنے کا اعلان کردیا۔
تفصیلات کے مطابق سوئی سدرن گیس کمپنی نے اتوار کو سی این جی اسٹیشنز کو سپلائی معطل کرنے کا فیصلہ کرلیا ، اس حوالے سے حکام کا کہنا ہے کہ
اتوارکو صبح 8 سے پیرصبح 8بجے تک اسٹیشنز کو سپلائی معطل رہے گی۔
سوئی گیس حکام نے کہا کہ پہلے مرحلے میں اسٹیشنز کو 24 گھنٹے کیلئے بند کیا جارہاہے، گیس کی طلب بڑھنے پر اسٹیشنز کو مزید بند کیا جاسکتا ہے۔
یاد رہے گذشتہ روز وفاقی وزیر منصوبہ بندی اسد عمر کی زیر صدارت کابینہ توانائی کمیٹی کے اجلاس میں گھریلو صارفین کو گیس کے سنگین بحران سے بچانے کے لیے اہم اقدامات کی منظوری دی گئی تھی۔
ذرائع کا کہنا تھا کہ سی این جی سیکٹر کو گیس کی فراہمی بند کرنے کی تجویز منظوری کی گئی، جس کے بعد سی این جی سیکٹر کو 2 ماہ تک کے لیے گیس کی فراہمی بند کی جا سکتی ہے۔
ذرائع کے مطابق اجلاس میں جنرل انڈسٹری کو بھی 2 ماہ کے لیےگیس فراہمی بند کرنے کی تجویز منظور کی گئی جبکہ کابینہ توانائی کمیٹی نے سردیوں میں گھریلو صارفین کو گیس سپلائی یقینی بنانے کی ہدایت بھی کی۔
