لاہور کی احتساب عدالت اور اسپیشل جج سینٹرل نے منی لانڈرنگ کیسز میں وزیراعظم کے بیٹے سلیمان شہباز کی عبوری ضمانت منظور کرلی۔
احتساب عدالت نے سلیمان شہباز کی عبوری ضمانت پر سماعت کی، سلیمان شہباز کے وکیل امجد پرویز نے بتایا کہ ملزم کو سیاسی بنیادوں پر کیس میں شامل کیا گیا، تحقیقات میں پیش ہونا چاہتا ہوں ضمانت منظور کی جائے۔
عدالت نے 5 لاکھ روپے کے مچلکوں کے عوض 7 جنوری تک عبوری ضمانت منظور کرتے ہوئے نیب کو نوٹس جاری کر دئیے۔
سلیمان شہباز اسپیشل جج سینٹرل کے روبرو پیش ہوئے عدالت کو بتایا کہ 16 ارب منی لانڈرنگ کیس کے مرکزی ملزم بری ہو چکے ہیں، جس کا حکم درخواست کے ساتھ منسلک ہے، ایف آئی اے تحقیقات میں شامل ہو کر جواب جمع کروا دیا ہے۔
عدالت ضمانت منظور کرنے کا حکم دے، عدالت نے پانچ لاکھ روپے کے مچلکوں کے عوض ضمانت منظور کرتے ہوئے ایف آئی اے کو سات جنوری کے لیے نوٹس جاری کر دئیے۔
