اسلام آباد : وفاقی وزیر سمندر پار پاکستانیز چوہدری سالک حسین نے ای او بی آئی پیشنرز کو بڑی خوشخبری سنادی۔
تفصیلات کے مطابق وفاقی وزیر سمندر پار پاکستانیز چوہدری سالک حسین نے کہا ہے ای او بی آئی کی پنشن میں 15فیصد اضافے کی سمری وفاقی کابینہ کو بھجوا دی ہے ،پنشن میں 15فیصداضافے سے پانچ لاکھ پنشنرز کو فائدہ ہوگا۔
چوہدری سالک حسین کا کہنا تھا کہ آئندہ بجٹ میں بنیادی تنخواہ بڑھانے کی تجویز دی جائے گی ، ان تمام اقدامات کا مقصد اجیرکے لئے آسانیاں پیدا کرنا ہے۔
انہوں نے کہا کہ وزارت مختلف ممالک کے ساتھ مزدوروں کو صحت سمیت ہر ممکن سہولیات دینے کے لئے رابطے میں ہیں۔ انہوں نے کہا کہ عالمی طلب کے مطابق ہم اپنے لوگوں کو تربیت فراہم کرنے پر توجہ مرکوز کر رہے ہیں۔
وفاقی وزیر چوہدری سالک حسین نے کہا کہ ورکرز کے بچوں کی جہیز گرانٹ کو چار لاکھ سے پانچ لاکھ ، ورکرز کی ڈیتھ گرانٹ آٹھ لاکھ سے بڑھا کر دس لاکھ کی ہے۔
خیال رہے وزیراعظم کی جانب سے مزدوروں کے کو ریلیف دینے کے معاملے سے متعلق مزدور دوست پیکج یکم مئی کو پیش کیے جانے کا امکان ہے۔
ذرائع وزارت خزانہ نے کہا تھا کہ وزیر اعظم شہباز شریف یکم مئی کو مزدور دوست پالیسیوں کا اعلان کریں گے۔
ذرائع کا کہنا تھا کہ وزیراعظم کی جانب سے ای اوبی آئی کی پنشن میں اضافے اور پنشن بجٹ میں 7 سے 8 ارب اضافے کا اعلان کیا جاسکتا ہے۔
اس کے علاوہ ای او بی آئی کا پنشن کا بجٹ 60 ارب سے بڑھا کر 68 ارب روپے تک پہنچانے کا اعلان ہوسکتا ہے۔
