اسلام آباد: سپریم کورٹ رولز 1980 میں ترمیم کا مسودہ تیار کر لیا گیا، چیف جسٹس یحییٰ آفریدی کی ہدایت پر اس کے جائزے کیلیے 4 رکنی کمیٹی تشکیل دی گئی تھی۔
اس حوالے سے جاری کیے گئے اعلامیے کے مطابق سپریم کورٹ کے رولز میں ڈیجیٹلائزیشن اور خودکار نظام متعارف کروانے کی سفارش کی گئی جبکہ عدالتی امور میں بہتری کیلیے بار کونسلز اور ججز سے تجاویز طلب کی گئیں۔
اعلامیے میں کہا گیا کہ مسودہ چیف جسٹس اور سپریم کورٹ کے ججز کو مزید غور کیلیے پیش کر دیا گیا، رولز میں ترمیم کیلیے بنائی گئی کمیٹی کی سربراہی جسٹس شاہد وحید کر رہے تھے جبکہ اس میں جسٹس عرفان سعادت، جسٹس نعیم افغان اور جسٹس عقیل عباسی بھی شامل تھے۔
مسودہ کے مطابق سپریم کورٹ میں مقدمات کے انتظام کو ڈیجیٹل پلیٹ فارمز کے ذریعے بہتر بنایا جائے گا جبکہ عدالتی کارروائیوں میں غیر ضروری تاخیر ختم کرنے کیلیے خودکار نظام متعارف کروانے کی تجویز ہے۔
اعلامیے کے مطابق مسودے کی منظوری کے بعد سپریم کورٹ رولز 2025 کو حتمی شکل دی جائے گی، انصاف کی فوری اور شفاف فراہمی کیلیے سپریم کورٹ میں نئے اصلاحات متعارف کروائی جائیں گی۔
