ممبئی : بالی ووڈ اداکار سشانت سنگھ راجپوت کی موت سے متعلق ایک درخواست کی سماعت کے دوران ان کی بہن کو ممبئی ہائی کورٹ کے فیصلے سے بڑا جھٹکا لگا ہے۔
اداکارہ ریا چکرورتی کی جانب سے درج کرائی گئی ایف آئی آر خارج کرانے کے لئے سشانت سنگھ راجپوت کی بہنوں میتو اور پرینکا نے ممبئی ہائی کورٹ میں درخواست دائر کی تھی۔
مذکورہ درخواست کی سماعت کرتے ہوئے ممبئی ہائی کورٹ نے میتو کے خلاف دائر درخواست کو منسوخ کرنے کا فیصلہ کیا جبکہ مرحوم کی بہن پرینکا کے خلاف درج ایف آئی آر کو خارج کرنے سے انکار کردیا گیا۔
اداکارہ ریا چکرورتی جو سشانت سنگھ راجپوت کی دوست تھیں انہوں نے گزشتہ سال سشانت سنگھ راجپوت کی دونوں بہنوں میتو سنگھ اور پرینکا سنگھ کے خلاف ایف آئی آر درج کرائی تھی۔
اپنی درخواست میں انہوں نے الزام عائد کیا تھا کہ مرحوم کی بہنوں نے دہلی کے ایک ڈاکٹر سے ملاقات کی اور سشانت سنگھ راجپوت کی دماغی صحت کے بارے میں معلومات دیئے بغیر دوا کا فرضی پرچہ بنوایا تھا۔
یاد رہے کہ اس سے قبل 3 فروری کو سپریم کورٹ کی جانب سے مفاد عامہ کی اس درخواست کو مسترد کردیا گیا تھا، جس میں سشانت سنگھ راجپوت موت کی تحقیقات میں سی بی آئی کو اسٹیٹس رپورٹ دائر کرنے کے لئے احکامات دینے کا مطالبہ کیا گیا تھا۔
واضح رہے کہ سشانت سنگھ راجپوت کی لاش 14 جون2020 کو ممبئی واقع ان کے اپارٹمنٹ سے ملی تھی۔
