ممبئی : بھارتی اداکار سشانت سنگھ راجپوت کی بہن شویتا سنگھ کیرتی نے بھائی کی موت کے سات ماہ بعد ایک خط سوشل میڈیا پر شیئر کیا ہے، انہوں نے کیپشن میں لکھا کہ یہ بھائی نے لکھا تھا، میرے بھائی کی یہ سوچ بہت گہری تھی۔
بالی ووڈ اداکار سشانت سنگھ راجپوت کو دنیا سے گئے ہوئے کل یعنی 14 جنوری کو پورے سات ماہ پورے ہوجائیں گے لیکن ان کے مداح ابھی بھی ان کی یادوں کو بھلا نہیں پارہے ہیں۔
سشانت سنگھ کی موت کے بعد سے مسلسل ان کی بہن شویتا سنگھ کیرتی ان کی نایاب تصویریں اور پرسنل نوٹس کو شیئر کر رہی ہیں، حال ہی میں انہوں نے سشانت سنگھ راجپوت کے ہاتھ سے لکھا ہوا ایک خط شیئر کیا ہے۔
جس میں اداکار نے30 سال کی عمر میں بہت گہری بات لکھی تھی۔ سشانت سنگھ راجپوت کا یہ نوٹ سوشل میڈیا پر صارفین کی توجہ کا مرکز بن رہا ہے۔
مذکورہ خط میں اداکار نے لکھا کہ مجھے لگتا ہے کہ میں نے اپنی زندگی کے پہلے 30 سال کچھ بننے میں ہی لگا دیئے، میں ہر چیز میں اچھا بننا چاہتا تھا۔ میں ٹینس، اسکول اور گریڈز میں اچھا بننا چاہتا تھا اور جو بھی چیزیں میں اس پس منظر میں دیکھتا تھا۔
سشانت نے لکھا کہ جس طرح سے میں تھا، اس سے میں متفق نہیں تھا لیکن اگر میں ان سب میں اچھا بن جاؤں تو مجھے محسوس ہوا کہ میں غلط جا رہا ہوں کیونکہ کھیل ہمیشہ اپنے آپ کو تلاش کرنے کا تھا جو کہ آپ پہلے سے ہی ہو۔
واضح رہے کہ سشانت سنگھ راجپوت کی موت کے بعد سے سی بی آئی، ای ڈی اور این سی بی اس معاملے کی تحقیقات میں لگے ہوئے ہیں۔ سشانت سنگھ کیس میں اداکارہ ریا چکرورتی کو گرفتار کیا گیا تھا، وہ تقریباً ایک ماہ تک جیل میں رہی جس کے بعد ممبئی ہائی کورٹ نے ضمانت پر رہا کردیا تھا۔
