اوکاڑہ: دریائے ستلج میں ڈوبنے والوں کی تلاش کے لیے جدید ٹیکنالوجی، ریڈار اور غوطہ خوروں کی مدد سے چوتھے روز تلاش شروع کر دی گئی۔
تفصیلات کے مطابق دریائے ستلج میں کشتی الٹنے سے لاپتا افراد کی تلاش چوتھے روز پھر شروع کر دی گئی، سرچ آپریشن میں پاک فوج، ریسکیو ٹیمیں حصہ لے رہی ہیں۔
ریسکیو ذرائع کے مطابق جدید ٹیکنالوجی، ریڈار اور غوطہ خوروں کی مدد سے سرچ آپریشن کیا جا رہا ہے، جس کی نگرانی ڈپٹی کمشنر، ڈسٹرکٹ ایمرجنسی آفیسر ظفر اقبال کر رہے ہیں۔
دریا سے اب تک 8 افراد کی لاشیں نکال کر لواحقین کے حوالے کی جا چکی ہیں، جب کہ 6 لاپتا افراد کی تلاش کے لیے سرچ آپریشن چوتھے روز بھی جاری ہے۔
یاد رہے کہ دریائے ستلج میں چار دن قبل سوجیکے کے مقام پر کشتی الٹنے کا واقعہ پیش آیا تھا، ڈپٹی کمشنر ذیشان حنیف کے مطابق کشتی میں 45 افراد سوار تھے، 33 کو بچا لیا گیا تھا۔ ضلعی انتظامیہ کا کہنا ہے کہ کشتی پر 45 افراد کے علاوہ کھاد کے بیگ، 15 سے 20 موٹر سائیکلیں بھی موجود تھیں، مسافروں میں سے 43 کا تعلق ضلع بہاولنگر کی تحصیل منچن آباد سے جب کہ 2 کا دیپالپور سے تھا۔
