لالی ووڈ کے معروف ہدایت کار سید نور کا کہنا ہے کہ بالی ووڈ رو رہا ہے اور ساؤتھ والے کارٹون فلمیں بنارہے ہیں۔
ہدایت کار سید نور نے حال ہی میں ایک شو میں شرکت کی جہاں میزبان نے ان سے سوال کیا کہ فلمیں بنانے والے ہمارے پاس بیٹھے ہیں لیکن فلمیں کہاں چلی گئی ہیں؟
سید نور نے جواب دیتے ہوئے کہا کہ پوری دنیا میں فلمیں ختم ہوگئی ہیں، بومبے بیٹھ کر رو رہا ہے اور ساؤتھ والے کارٹون فلمیں بنارہے ہیں، فلم انٹرٹینمنٹ ہے اور اب فلموں سے انٹرٹینمنٹ نکل گئی اور ٹک ٹاک، یوٹیوب، نیٹ فلکس، کامیڈی شوز پر آگئی ہے۔
انہوں نے کہا کہ جب فلموں سے یہ سب کچھ نکل گیا تو باقی کارٹون ہی بچا ہے تو وہ ہم بنا نہیں سکتے کیونکہ ہمارے پاس وہ ٹیکنالوجی نہیں ہے۔
ہدایت کار نے کہا کہ ہم ساری زندگی ٹیکنالوجی کو ہی روتے رہے ہیں، پہلے کیمرے اور لیبارٹری نہیں تھی لیکن ہم کوشش کررہے ہیں میں ایک چندی گڑھ کے لڑکے کی کہانی پر پنجابی فلم بنا رہا ہوں جس میں سکھ لڑکا ہے لاہور دیکھنے کے لیے آیا ہے۔
واضح رہے کہ اس سے قبل ایک انٹرویو میں اداکارہ ریشم کے بارے میں بات کرتے ہوئے سید نور کا کہنا تھا کہ ریشم ایک ذہین اداکارہ ہیں، میں نے ہی انہیں فلم انڈسٹری میں متعارف کرایا لیکن وہ مجھے اپنا استاد نہیں مانتی ہیں۔
سید نور نے کہا تھا کہ وہ صرف ایوب خاور اور چند دیگر کو اپنا استاد مانتی ہیں لیکن اس کے باوجود مجھے ان سے کوئی شکایت نہیں ہے، مجھے فخر ہے کہ میں نے ریشم کو ہر ممکن طور پر کامیاب بنانے میں مدد کی۔
ہدایتکار سید نور کا کہنا تھا کہ میں اس سے ناراض نہیں ہوں لیکن میں نہیں جانتا کہ وہ کیوں کام نہیں کر رہی ہیں یا لوگ اسے کیوں کاسٹ نہیں کر رہے ہیں؟ لیکن اس وقت میرے پاس ان کے لیے کوئی کردار نہیں ہے، اگر میرے پاس انکے لیے کوئی کردار ہوا تو میں انہیں ضرور کاسٹ کرونگا۔
یاد رہے کہ ریشم نے کہا تھا کہ سید نور بدقسمت ہیں جنہوں نے صائمہ کی محبت کی وجہ سے میرے ساتھ کام کرنا چھوڑ دیا۔
