ٹی ٹوئنٹی ورلڈ کپ آئندہ سال جون میں امریکا اور ویسٹ انڈیز میں مشترکہ طور پر کھیلا جائے گا اس میں پاک بھارت ٹاکرا کب ہوگا وینیو اور تاریخ سامنے آ گئی۔
کرکٹ کا ایونٹ اور میدان کوئی بھی ہو۔ شائقین کرکٹ کے ساتھ دنیا بھر کو جس میچ کا شدت سے انتظار رہتا ہے وہ روایتی حریفوں پاکستان اور بھارت کے درمیان میچ کا ہوتا ہے جس کو جوش اور جنون کے باعث پاک بھارت ٹاکرے کا نام دیا جاتا ہے۔
یہ میچ ہر ایونٹ کا سب سے بڑا میچ کہلاتا ہے کیونکہ اس پر صرف پاکستان اور بھارت کے شائقین کرکٹ کی ہی نہیں بلکہ دنیا بھر کی نظریں جمی ہوتی ہیں جیسا کہ آئندہ سال ٹی ٹوئنٹی ورلڈ کپ کے حوالے سے لوگ یہ جاننے کے لیے بے چین ہیں۔
مختصر دورانیے کی کرکٹ یعنی ٹی ٹوئنٹی کا عالمی کپ جون میں ویسٹ انڈیز اور امریکا کی مشترکہ میزبانی میں کھیلا جائے گا جس میں 20 ٹیمیں شرکت کریں گی لیکن مرکز نگاہ پاک بھارت ٹاکرا ہوگا جس کی تاریخ اور وینیو سامنے آ گیا ہے۔
ذرائع کا کہنا ہے کہ آئندہ سال کرکٹ کا سب سے بڑا مقابلہ شائقین کرکٹ 9 جون کو نیویارک میں دیکھ سکیں گے جو ٹی ٹوئنٹی ورلڈ کپ میں پاکستان اور بھارت کے درمیان ہونے والا میچ ہوگا۔
ذرائع کا کہنا ہے کہ ایونٹ کے اکثر میچز ڈے اینڈ نائٹ ہیں لیکن پاکستان اور بھارت کے معیاری وقت کو مدنظر رکھتے ہوئے یہ میچ امریکا میں دن کی روشنی میں کھیلا جائے گا۔
