قومی ٹیم کے جارح مزاج بیٹر افتخار احمد کا کہنا ہے کہ سوئپ اور ریورس سوئپ شاٹس کی تیاریاں کررہا ہوں۔
آئی سی سی ٹی 20 ورلڈ کپ میں بھارت کے خلاف نصف سنچری اسکور کرنے والے قومی ٹیم کے مڈل آرڈر بیٹر افتخار احمد کا کہنا ہے کہ بھارت کے خلاف پرفارمنس سے مورال بلند ہوا ہے۔
انہوں نے کہا کہ جب بھی بیٹنگ آتی ہے تو کوشش ہوتی ہے کہ ٹیم کو میچ جتواؤں۔ میں سوئپ، ریورس سوئپ شاٹس کی تیاری کررہا ہوں۔
آل راؤنڈر نے ناقدین سے متعلق کہا کہ ’ناقدین کو کیا کہوں میرے پاس جواب نہیں ہے۔‘
واضح رہے کہ پاکستان ٹیم زمبابوے کیخلاف ٹی ٹوئنٹی ورلڈکپ کا اپنا دوسرا میچ کل پرتھ میں کھیلے گی، پہلے میچ میں گرین شرٹس کو بھارت کے ہاتھوں سنسنی خیز مقابلے کے بعد شکست ہوئی تھی۔
کرکٹ ٹیم کے 8 کھلاڑیوں نے پریکٹس سیشن میں حصہ لیا جن میں بابر اعظم، محمد رضوان، شاہنواز دھانی، فخر زمان، عثمان قادر، محمد حارث، محمد حسنین اور خوشدل شاہ شامل تھے۔
ٹریننگ سیشن میں ہیڈ کوچ ثقلین مشتاق، بولنگ کوچ شان ٹیٹ اور بیٹنگ کوچ محمد یوسف بھی موجود تھے۔
