فجیرہ: ہارون خان نے فجیرہ اوپن انٹرنیشنل تائیکوانڈو چیمپئن شپ 2025 میں کانسی کا تمغہ جیت لیا۔
پاکستان کے تائیکوانڈو اسٹار ہارون خان نے 9 فروری 2025 کو فجیرہ اوپن انٹرنیشنل تائیکوانڈو چیمپئن شپ (جی-2 کیٹیگری) یو اے ای میں شان دار کارکردگی کا مظاہرہ کرتے ہوئے کانسی کا تمغہ حاصل کر لیا ہے۔
ہارون نے 3 مسلسل کامیابیاں حاصل کیں، لیکن سیمی فائنل میں ایران کے حسین پور علیرضا کے ہاتھوں شکست کا سامنا کرنا پڑا۔ ابتدائی مقابلوں میں ہارون نے کویت کے الکلی ایف اور ایران کے خواجوی راستین کے خلاف شان دار فتح حاصل کی۔
ابتدائی مقابلوں میں ہارون خان نے اپنی حکمت عملی اور طاقت ور ککس کا مظاہرہ کیا، تاہم سیمی فائنل میں ایران کے کھلاڑی حسین پور علیرضا نے سخت مقابلے کے بعد کامیابی حاصل کر لی۔
مقابلے کے بعد گفتگو کرتے ہوئے ہارون خان نے اپنے اس اعزاز پر فخر کا اظہار کیا، انھوں نے کہا ’’پاکستان کے لیے اس سطح پر میڈل جیتنا میرے لیے اعزاز کی بات ہے۔ میں مزید محنت کروں گا تاکہ آئندہ مقابلوں میں سونے کا تمغہ حاصل کر سکوں۔‘‘
ہارون خان کی اس کامیابی کو ملک بھر میں کھیلوں کے شائقین نے سراہا ہے، اور اسے نوجوان کھلاڑیوں کے لیے ایک مثال قرار دیا ہے۔
