کابل : افغان طالبان کے نئے امیر ہیبت اللہ اخونزادہ نے جاری اپنے پہلے پیغام میں امریکا کو پیغام دیا ہے کہ وہ افغانستان کی سرزمین سے نکل جائے۔
غیر ملکی خبررساں ایجنسی کے مطابق افغان امیر نے رمضان المبارک کے اختتام اورعید کے موقع پر جاری اپنے پیغام میں کہا ہے کہ ’’افغانستان میں موجود امریکا اور اس کے اتحادی حقائق کو تسلیم کرتے ہوئے جلد از جلد ہماری سرزمین پر سے قبضہ ختم کردیں اور افغانیوں کے خلاف طاقت کے استعمال کو ترک کر دیں۔
انہوں نے مزید کہا کہ افغانستان کے عوام بہادر جو کسی سے خوفزدہ نہیں ہوتے،عوام اپنے وطن میں قابض افواج کی غلامی کسی بھی صورت قبول نہیں کریں گے بلکہ غلامی سے نجات حاصل کرنے کے لیے لڑتے ہوئے مرجانے کو ترجیح دیں گے، طالبان امیر نے امریکا کو متنبہ کیا کہ افغانستان میں امریکی افواج کے قیام سے جہاد مزید تیز ہوگا، امریکا افغانستان کو فتح کرنے میں کبھی کامیاب نہیں ہوگا۔
