قومی ٹیم کے سابق فاسٹ بولر تنویر احمد کا کہنا ہے کہ پہلے ہی نظر آگیا تھا کہ سرفراز احمد کی کپتانی جانے والی ہے اور اب سرفراز کی کوئٹہ گلیڈی ایٹرز سے کرکٹ ختم ہوتی نظر آرہی ہے۔
نجی ٹی وی کے پروگرام میں گفتگو کرتے ہوئے سابق فاسٹ بولر تنویر احمد نے کہا کہ پچھلے دو تین سال سے بطور کپتان سرفراز احمد کی کارکردگی اچھی نہیں تھی، معین خان نے بھی میڈیا سے گفتگو میں ان کی کارکردگی پر تنقید کی تھی۔
انہوں نے کہا کہ ان سب باتوں سے یہ نظر آگیا تھا کہ سرفراز کی کپتانی اب ختم ہونے جارہی ہے۔
تنویر احمد نے کہا کہ میرا خیال ہے کہ اگر ندیم عمر باضابطہ اعلان کرتے کہ سرفراز کو کپتانی سے ہٹارہے ہیں تو میڈیا ان کے پیچھے پڑ جاتا یہی وجہ ہے کہ اس طرح کا فیصلہ کیا گیا ہے۔
سابق فاسٹ بولر نے کہا کہ شین واٹسن کے آنے سے پہلے ان کی جانب سے یہ نہیں کہا جارہا تھا کہ سرفراز کو کپتانی سے ہٹا رہے ہیں جیسے ہی وہ آئے تو یہ فیصلہ کرلیا گیا۔
انہوں نے کہا کہ مجھے لگتا ہے کہ اب سرفراز کی کوئٹہ گلیڈی ایٹرز سے کرکٹ ختم ہوتی نظر آرہی ہے، اس دفعہ وہ کم میچز کھیلے تو اگلی مرتبہ ہوسکتا ہے وہ ٹیم میں نہ بھی ہوں۔
واضح رہے کہ پی ایس ایل 9 میں کوئٹہ گلیڈی ایٹرز نے سرفراز کو کپتانی سے ہٹاکر رائلی روسو کو قیادت سونپی ہے جبکہ سعود شکیل نائب کپتان ہیں۔
