اسلام آباد: وفاقی حکومت نے ملک میں مصنوعی ذہانت (اے آئی) سے متعلق ٹاسک فورس تشکیل دے دی، ٹاسک فورس معیشت، گورننس اور تعلیم میں اصلاحات متعارف کروانے کا لائحہ عمل تجویز کرے گی۔
تفصیلات کے مطابق وفاقی وزیر برائے ترقی و منصوبہ بندی احسن اقبال نے 15 رکنی قومی ٹاسک فورس برائے آرٹیفیشل انٹیلی جنس تشکیل دے دی۔
ٹاسک فورس میں مصنوعی ذہانت کے ماہرین، نجی شعبہ اور حکومتی نمائندے شامل ہیں۔
ٹاسک فورس معیشت، گورننس اور تعلیم میں اصلاحات متعارف کروانے کا لائحہ عمل تجویز کرے گی۔
وفاقی وزیر احسن اقبال کا کہنا تھا کہ آرٹیفیشل انٹیلی جنس میں مہارت آنے والے دور میں ترقی کی ضامن ہے، معیشت، گورننس اور تعلیم میں آرٹیفیشل انٹیلی جنس سے دور رس تبدیلیاں ہو رہی ہیں۔
انہوں نے کہا کہ ٹاسک فورس آرٹیفیشل انٹیلی جنس کے استعمال، فیصلہ سازی اور 10 سالہ روڈ میپ تیار کرے گی، سنہ 2018 میں مسلم لیگ ن کی حکومت نے اے آئی کا قومی مرکز قائم کیا تھا۔
