آکلینڈ: پاکستان کرکٹ بورڈ نے انجرڈ ہونے والے قومی ٹیم کے بلے باز کو نیوزی لینڈ سے وطن واپس بھیجنے کا فیصلہ کرلیا۔
اے آر وائی نیوز کی رپورٹ کے مطابق بائیں ہاتھ سے بیٹنگ کرنے والے نوجوان بلے باز امام الحق کو ٹریننگ کے دوران انگوٹھے پر گیند لگی جس کی وجہ سے وہ اب بیٹنگ کرنے سے قاصر ہیں، اسی وجہ سے انہیں دوسرے ٹیسٹ سے باہر کیا گیا۔
ٹیم مینجمنٹ نے انجری کے باعث امام الحق کو وطن واپس بھیجنے کا فیصلہ کیا۔ ذرائع کے مطابق بلے باز کل شام آکلینڈ سے لاہور کے لیے روانہ ہوں گے۔
قومی ٹیم کے میڈیکل بورڈ کے مطابق بلے باز بابر اعظم کی انجری میں تیزی سے بہتری آرہی ہے جس کے بعد ڈاکٹرز نے انہیں ٹریننگ کی اجازت دے دی، بابر اعظم نے ہارڈ بال ناکنگ کا آغاز بھی کردیا ہے۔
مزید پڑھیں: شاداب خان انجری کا شکار، ایک اور سیریز سے باہر
ذرائع کے مطابق دوسرے ٹیسٹ میں بابر اعظم کی شرکت کا فیصلہ میچ سے قبل کیا جائے گا۔
آج ہی شاداب خان کو بھی ڈاکٹرز نے چھے ہفتے آرام کا مشورہ دیا جس کے باعث وہ دوسرا ٹیسٹ میچ نہیں کھیل سکیں گے۔ شاداب خان ٹی ٹوینٹی میچ کے دوران انجری کا شکار ہوئے تھے۔
