لاہور : نیلم جہلم ہائیڈرو پاور پروجیکٹ میں فنی خرابی کے باعث ایک سال کے دوران نیشنل گرڈ سستی بجلی کے 5 ارب یونٹ سے محروم ہے۔
تفصیلات کے مطابق نیلم جہلم ہائیڈرو پاور پروجیکٹ میں فنی خرابی ایک سال بعد بھی دور نہ ہوسکی ، ذرائع نے بتایا کہ ایک سال کے دوران نیشنل گرڈ سستی بجلی کے 5 ارب یونٹ سے محروم ہے۔
ذرائع کا کہنا ہے کہ پاور پروجیکٹ کی بندش سے قومی خزانے کو اربوں روپے نقصان کا سامنا ہے ، نیلم جہلم ہائیڈرو پاور پروجیکٹ آزاد کشمیر میں اپریل 2018 میں تعمیر کیا گیا تھا۔
نیلم جہلم ہائیڈرو پاور پروجیکٹ کی ایک سرنگ میں گزشتہ سال کریک آگئے تھے ، جس کے بعد نیلم جہلم پاور پروجیکٹ میں فنی خرابی کا وزیر اعظم نے بھی نوٹس لیا تھااور خرابی کے ذمہ داروں کا تعین کرنے کے احکامات بھی جاری کئے تھے۔
نیلم جہلم ہائیڈرو پاور پروجیکٹ کی پیداواری صلاحیت 969 میگاواٹ ہے ، ترجمان نے بتایا ہے کہ نیلم جہلم ہائیڈرو پاور پروجیکٹ کی بحالی کا کام شروع کردیا گیا ہے، پاور پروجیکٹ جولائی کے آخر میں پیداوار شروع کردے گا۔
