اسلام آباد: پاک بھارت حالیہ کشیدگی کے تناظر میں وزیرِ اعظم عمران خان اور برطانوی وزیر اعظم تھریسامے میں ٹیلی فونک رابطہ ہوا ہے۔
تفصیلات کے مطابق پاک برطانیہ وزرائے اعظم کے مابین فون پر بات ہوئی، دونوں رہنماؤں نے پاک بھارت کشیدگی کے تناظر میں تفصیلی گفتگو کی۔
[bs-quote quote=”وزیر اعظم تھریسامے نے دورہ پاکستان کی دعوت قبول کر لی۔” style=”style-8″ align=”left”][/bs-quote]
دونوں رہنماؤں میں پلوامہ حملے کے بعد کی صورتِ حال پر بھی تبادلہ خیال ہوا۔
عمران خان نے پاکستان کے مؤقف کی حمایت پر برطانوی ہم منصب کا شکریہ ادا کیا، برطانوی وزیر اعظم تھریسامے نے بھارتی پائلٹ کی رہائی کے فیصلے کی تعریف کی۔
برطانوی وزیراعظم نے کہا کہ بھارتی پائلٹ کی رہائی کے فیصلے کو عالمی سطح پر پذیرائی ملی ہے، پاکستان اور بھارت میں کشیدگی کم ہونی چاہیے۔
وزیر اعظم تھریسامے کا کہنا تھا کہ برطانیہ پاک بھارت کشیدگی کے معاملے کی سنجیدگی کے پیشِ نظر دونوں ممالک سے رابطے میں ہے۔
یہ بھی پڑھیں: پاک بھارت کشیدگی: دونوں ممالک کو مذاکرات کی میز پر لانے کی کوشش کررہے ہیں، مائیک پومپیو
دریں اثنا، وزیر اعظم عمران خان نے برطانوی ہم منصب کو دورۂ پاکستان کی دعوت دے دی، وزیر اعظم تھریسامے نے دورہ پاکستان کی دعوت قبول کر لی۔
یاد رہے کہ امریکی سیکریٹری خارجہ مائیک پومپیو نے بھی کہا تھا کہ وہ پاک بھارت قیادت کے ساتھ مکمل رابطے میں ہیں، امریکا کی کوشش ہے پاکستان اور بھارت کو مذاکرات کی میز پر لایا جائے۔
