راولپنڈی: بلوچستان میں دہشتگردوں نے سکیورٹی فورسز کی چیک پوسٹ پر حملہ کیا گیا ہے جس کے نتیجے میں پاک فوج کے ایک جوان نے جام شہادت نوش کیا ہے۔
پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق بلوچستان کے ضلع کیچ میں فوجی چیک پوسٹ پر دہشت گردوں کی جانب سے فائرنگ کی گئی۔
آئی ایس پی آر کے مطابق سکیورٹی فورسز کی جانب سے فوری اور مؤثر جوابی کارروائی کی گئی، فائرنگ کے تبادلے میں پاک فوج کا سپاہی شہید ہو گیا، شہید ہونے والے سپاہی کا نام محمد قیصر ہے۔
آئی ایس پی آر کے مطابق دہشت گرد حملے کے بعد سکیورٹی فورسز کی جانب سے علاقے میں کلیئرنس آپریشن جاری ہے۔
سیکیورٹی فورسز میں آج ہونے والا یہ دوسرا حملہ ہے، اس سے قبل ہنگو کے علاقے تھل میں دہشت گردوں کی جانب سے فوجی پوسٹ پر حملہ کیا گیا ، جس کے نتیجے میں 26سالہ سپاہی وقاص شہید ہوا۔
یاد رہے دو روز قبل شمالی وزیرستان کے علاقے اسپن وام میں فورسز کی چیک پوسٹ پر نامعلوم دہشت گردوں نے فائرنگ کی گئی تھی ، جس پر فورسز کی جانب سے دہشت گردوں کو فوری اور جوابی ردعمل دیا اور ان کے ٹھکانوں کو نشانہ بنایا۔
دہشت گردوں سے فائرنگ کے تبادلے میں پچیس سالہ سپاہی سیف اللہ نے جام شہادت نوش کیا تھا۔
