قومی ٹیم کے سابق کپتان محمد حفیظ کی ٹیم ٹیکساس چارجرز نے یو ایس ماسٹرز ٹی 10 لیگ میں فتح کا تاج اپنے سر پر سجا لیا۔
مصباح الحق کی نیویارک واریئرز کے خلاف فائنل میں میچ برابر ہونے کے بعد سپر اوور دیا گیا، جس میں محمد حفیظ کی ٹیم نے 15 رنز بنائے جبکہ مصباح کی ٹیم واریئرز 13 رنز اسکور کرسکی۔
فائنل میں نیویارک واریئرز کا آغاز ڈرامائی رہا، پہلی گیند پر کامران اکمل آؤٹ ہوئے، پھر دلشان نے 18 اور رچرڈ لیوی نے 17 رنز بنائے، مصباح 5، شاہد آفریدی ایک اور عبدالرزاق 3 رن بنا کر پویلین لوٹ گئے۔
جوناتھن کارٹر نے 17 گیندوں پر 39 رنز کی ناقابل شکست اننگز کھیلی اور ٹیم کا اسکور 6 وکٹ پر 92 تک پہنچانے میں اہم کردار ادا کیا۔
ٹیکساس چارجرز کے مختار ہدف کے تعاقب میں 6 رن بنا کرپویلین لوٹ گئے، دوسری جانب سے محمد حفیظ نے لاٹھی چارج کیا، 4 چھکے اور 4 چوکے لگائے، بین ڈنک نے بھی 20 رنز رنز جوڑے۔
محمد حفیظ نے17 گیندوں پر 46 رنز بنا کر اپنی ٹیم کی جیت میں اہم کردار ادا کیا، لیکن پھر دھڑا دھڑ وکٹیں گرنا شروع ہوگئیں، پہلے عمید آصف نے وکٹ لی۔ پھر سہیل خان نے ایک اوور میں 4 کھلاڑیوں کو پویلین کی راہ دکھائی۔
میچ کی آخری دو گیندوں پر شاہد آفریدی نے 2 وکٹیں اڑائیں اور میچ برابر ہو گیا۔
تاہم سپر اوور میں محمد حفیظ کی ٹیم چارجرز نے 15 رنز بنائے، جواب میں واریئرز صرف 13رنز اسکور کرسکی اور یوں محمد حفیظ کی ٹیم نے میچ سپر اوور میں 2 رنز سے جیت کر ٹائٹل اپنے نام کر لیا۔
