واشنگٹن: امریکا میں حکومتی شٹ ڈاؤن تو ختم ہوگیا لیکن ملکی معیشت کو بڑا نقصان اٹھانا پڑا۔
تفصیلات کے مطابق امریکا میں کئی ہفتوں سے جاری حکومتی شٹ ڈاؤن ختم ہوگیا، لیکن ملکی معیشت کو 11 بلین ڈالرز کا نقصان ہوا۔
غیر ملکی خبر رساں ادارے کا کہنا ہے کہ امریکا میں 35 روزہ جزوی بندش کے باعث ملکی سرمایہ کاری اور دیگر تجاری امور بھی متاثر رہے۔
مقامی ادارہ برائے بجٹ کے مطابق شٹ ڈاؤن کے خاتمے سے حکومت کی بحالی اور آٹھ لاکھ سے زائد وفاقی ملازمین کی واپسی کے بعد ملکی معیشت کا کافی حد تک نقصان کا ازالہ ممکن ہے۔
امریکی صدر ڈونلڈ ٹرمپ کی طرف سے میکسیکو کی سرحد پر دیوار کی تعمیر کے لیے پانچ بلین ڈالرز کے مطالبے کے سبب امریکی حکومت اور کانگریس کے درمیان تنازعہ حکومت کی جزوی بندش کا سبب بنا تھا۔
امریکا میں شٹ ڈاؤن ختم، صدر ٹرمپ اور کانگریس کے درمیان معاہدہ طے پاگیا
کانگریس رہنماؤں سے مذاکرات کے بعد امریکی صدر ڈونلڈ ٹرمپ نے 26 جنوری کو عارضی طور پر 15 فروری تک سرکاری اداروں میں شٹ ڈاؤن ختم کردیا، امریکا میں کئی ہفتوں کے شٹ ڈاؤن کے بعد سرکاری اداروں میں کام شروع ہوچکا ہے۔
خیال رہے کہ ڈیل سے قبل امریکی سینیٹ حکومتی شٹ ڈاؤن ختم کرانے میں ناکام ہوگئی تھی، سینیٹ میں ڈیموکریٹس اور ری پبلکنز کو بل منظور کرانے میں ناکامی کا سامنا کرنا پڑا تھا۔
قبل ازیں امریکی میڈیا نے دعویٰ کیا تھا کہ صدر ٹرمپ ملک میں ایمرجنسی لگاکر بارڈر سیکیورٹی فنڈز منظور کرانے کا ارادہ کرچکے ہیں۔
