اسلام آباد : پی ٹی آئی رہنما اور وکیل حسان نیازی کو جوڈیشل کمپلیکس کے باہر سے گرفتار کرنے پر اسلام آباد پولیس کا مؤقف سامنے آگیا۔
اسلام آباد پولیس نے حسان نیازی کی گرفتاری پر کہا کہ حسان نیازی کو پولیس ناکے پر مزاحمت اور بدتمیزی پرگرفتارکیا گیا ان کیخلاف پولیس سے مزاحمت پر مقدمہ درج کیا جارہا ہے۔
ضمانت کے باوجود پی ٹی آئی رہنما اور وکیل حسان نیازی کو گرفتار کرلیا گیا
پولیس کا مزید کہنا ہے کہ حسان نیازی کیخلاف تھانہ رمنا میں مقدمہ درج کیا جارہا ہے جبکہ انہیں گرفتار کر کے نامعلوم جگہ پر منتقل کر دیا گیا ہے۔
دوسری جانب پی ٹی آئی نے اسلام آباد ہائیکورٹ میں بازیابی کی درخواست دائر کر دی ہے، درخواست وکیل فیصل چوہدری اور سلمان نیازی نے دائر کی، چیف جسٹس نے ہائیکورٹ کے وکلا سے مکالمہ میں کہا کہ آپ درخواست دائر کریں آج ہی اس کیس کو سنیں گے۔
واضح رہے کہ حسان نیازی عمران خان کے بھانجے اور وکیل رہنما ہیں۔
