The news is by your side.

ارشد شریف شہید کا جسد خاکی قومی پرچم میں لپیٹ دیا گیا

پاکستان کے سینیئر اور ہر دلعزیز صحافی و اینکر ارشد شریف شہید کا جسد خاکی قومی پرچم میں لپیٹ دیا گیا اور میت کو ایئرپورٹ سے قائداعظم انٹرنیشنل اسپتال پہنچا دیا گیا۔

اے آر وائی نیوز کے مطابق کینیا میں پولیس کی گولی سے شہید پاکستان کے ہر دلعزیز سینیئر صحافی اور اینکر ارشد شریف کی میت گزشتہ شب وطن واپس لائی گئی، ایئرپورٹ پر ان کے جسد خاکی کو قومی پرچم میں لپیٹ کر قائداعظم انٹرنیشنل اسپتال پہنچا دیا گیا ہے، ان کی تدفین کل ہوگی۔

ارشد شریف کی میت کو ایئرپورٹ آمد پر شہید کے اہلخانہ نے وصول کیا، اس موقع پر اے آر وائی نیوز کی ٹیم، پی ٹی آئی رہنماؤں سمیت شہریوں کی بڑی تعداد موجود تھی، اس موقع پر انتہائی جذباتی مناظر دیکھنے میں آئے، شہریوں ںے قومی پرچم اٹھا کر ارشد تیرے خون سے انقلاب آئیگا نعرے لگائے۔

میت کو قومی پرچم میں لپیٹے جانے کے وقت پی ٹی آئی رہنما مراد سعید بھی وہاں موجود تھے اور شہید کی والدہ کی خواہش پر ہی مراد سعید کو میت کو اسپتال روانگی کے وقت ایمبولینس میں ساتھ بٹھایا گیا، اس موقع پر شہریوں نے میت اسپتال لے جانیوالی ایمبولینس پر گل پاشی بھی کی۔

 

ارشد شریف کا جسد خاکی کل تک اسپتال میں رکھا جائیگا، جہاں سے میت کو فیصل مسجد اسلام آباد لایا جائیگا، جہاں ان کی نماز جنازہ ہوگی اور وفاقی دارالحکومت میں ہی انہیں سپرد خاک کیا جائیگا۔

واضح رہے کہ ارشد شریف دو روز قبل نیروبی میں پولیس کی گولی سے شہید ہوگئے تھے، کینیا پولیس کا کہنا ہے کہ واقعہ غلط فہمی کے سبب پیش آیا۔

Comments

یہ بھی پڑھیں