ہر سال کی طرح نئے اسلامی سال کے آغاز پر غلاف کعبہ تبدیل کیا گیا اس سلسلے میں مسجد الحرام خانہ کعبہ میں غلاف کعبہ تبدیلی کی روح پرور تقریب ہوئی۔
عرب میڈیا کے مطابق ہر سال کی طرح نئے اسلامی سال کے آغاز پر یکم محرم الحرام کو غلاف کعبہ تبدیل کیا گیا۔ اس سلسلے میں منگل اور بدھ کی درمیانی شپ مسجد الحرام خانہ کعبہ میں غلاف کعبہ کی روح پرور تقریب ہوئی۔ حرمین شریفین انتظامیہ کے سربراہ اعلی شیخ ڈاکٹر عبدالرحمن السدیس کی زیر نگرانی کنگ عبدالعزیز کسوہ کمپلیکس کے ماہرین کی ایک ٹیم نے یہ کام مکمل کیا۔ غلاف کعبہ کو باندھنے والے سنہری کڑوں کو ہٹانے، پرائے غلاف کی جگہ نئے غلاف کی تبدیلی کے عمل میں تین سے چار گھنٹے لگے۔
#فيديو_واس | الكعبة المشرفة ترتدي حلتها الجديدة.#واس_عام pic.twitter.com/Cmustg3x6u
— واس العام (@SPAregions) July 18, 2023
اس موقع پر شیخ ڈاکٹرعبدالرحمن السدیس نے تقریب سے خطاب میں کہا کہ غلاف کعبہ کے حوالے سے کنگ عبدالعزیز کمپلکس اکیڈمی قائم کرنے کا اسٹرٹیجک منصوبہ بنایا گیا ہے جس میں سعودی نوجوانوں کو خصوصی کورس اور تربیت دی جائے گی۔
غلاف کعبہ میں سونے، چاندی اور خالص ریشم کا استعمال کیا جاتا ہے۔ اسکی تیاری میں جدید مشینری استعمال کی جاتی ہے جو ماہرین کی زیر نگرانی کارکن محنت اور لگن سے تیار کرتے ہیں۔ پیداوار اور مینوفیکچرنگ کے تمام مراحل مکمل ہونے پر اور ذی القعدہ کے مہینے کے وسط میں خانہ کعبہ کے غلاف کے کارخانے میں سالانہ تقریب ہوتی ہے اور غلاف کو نگران اعلیٰ کے حوالے کیا جاتا ہے۔
#صور | استبدال كسوة الكعبة المشرفة.#واس_عام pic.twitter.com/uDpzWjILEo
— واس العام (@SPAregions) July 18, 2023
اس سال نئے غلاف کعبہ کی تیاری پر تقریباً 25 ملین ریال لاگت آئی ہے۔ اس میں سونے اور چاندی کے علاوہ 850 کلو گرام خام ریشم استعمال ہوا۔ 100 سے زیادہ ہنر مند کاریگروں نے غلاف کے 55 ٹکڑوں کی تیاری پر کام کیا اور ہر ٹکڑے کی کڑھائی میں 60 سے 120 دن لگے۔ غلاف کعبہ کی تیاری میں استعمال ہونے والے مواد کے معیار کو استعمال سے قبل لیبارٹری میں ٹیسٹ کیا گیا۔
اس سے قبل کنگ عبدالعزیز کسوہ کمپلیکس سے غلاف کعبہ کو مخصوص ٹرکوں اورگاڑیوں سے مخصوص راستے سے جلوس کی شکل میں مسجد الحرام تک لایا گیا تھا اور اسے مسجد الحرام کے بیرونی دروازے سے مطاف تک پہنچانے کے لیے مخصوص راستے کا تعین کیا گیا تھا۔
واضح رہے کہ غلاف کعبہ تبدیلی کے تمام عمل کے دوران ہر ایک حصے کو علیحدہ علیحدہ کعبہ کے بالائی حصے پر لایا جاتا ہے جہاں سے پھر انہیں اتارا جاتا ہے اور پچھلا غلاف اتار لیا جاتا ہے۔ یہ عمل چار مرتبہ باری باری دہرایا جاتا ہے جب تک کہ نیا غلاف چڑھا نہ دیا جائے اور پرانا اتر نہ جائے۔
اس سے قبل کئی دہائیوں سے غلاف کعبہ (کِسوۃ) ہر سال حج کے دوران 9 ذوالحج کی صبح کو حجاج کے میدان عرفات روانہ ہونے کے بعد تبدیل کیا جاتا تھا تاہم گزشتہ سال غلاف کعبہ تبدیل کرنے کی سالانہ تقریب اب ہر سال یکم محرم کو منعقد کرنے کا اعلان کیا گیا تھا۔
