راولپنڈی: صدر مملکت ڈاکٹر عارف علوی اور آرمی چیف جنرل قمر جاوید باجود نے اسپیکر قومی اسمبلی اسد قیصر کو ٹیلی فون کیا اور خیریت دریافت کی۔
تفصیلات کے مطابق ٹیلی فونک گفتگو کے دوران صدر مملکت نے اسپیکرقومی اسمبلی اسد قیصر کی جلد صحت یابی کے لیے دعا اور نیک تمناؤں کا اظہار کیا۔
ان کا کہنا تھا کہ امید ہے جلد صحتیاب ہو کر قومی امور کی انجام دہی شروع کریں گے۔ اسپیکر نے کہا کہ پہلے سے بہت بہتر محسوس کر رہا ہوں، مکمل صحتیابی کے لیے پر امید ہوں، حکومتی گائیڈ لائنز اور ڈاکٹرز کی احتیاطی تدابیر پر عمل کر رہا ہوں۔ دریں اثنا صدر مملکت نے اسد قیصر کے بچوں کی خیریت کے بارے میں بھی پوچھا۔
اسپیکر قومی اسمبلی کی صحت سے متعلق ترجمان کی اہم وضاحت
بعد ازاں آرمی چیف جنرل قمر جاوید باجوہ نے اسپیکر قومی اسمبلی اسدقیصر کو ٹیلیفون کیا۔ آرمی چیف نے اسپیکر قومی اسمبلی اسدقیصر سے خیریت دریافت کی اور جلد صحت یابی کے لیے دعا کی۔
چند روز قبل اسپیکر قومی اسمبلی اسد قیصر کا کورونا ٹیسٹ مثبت آنے کے بعد انہوں نے خود کو گھر میں قرنطینہ کر لیا تھا، اُن کے صاحبزادے اور صاحبزادی کے کورونا ٹیسٹ بھی مثبت آئے تھے۔
اسد قیصر نے بتایا تھا کہ ٹیسٹ رپورٹ موصول ہونے کے بعد میں نے خود کو گھر میں قرنطینہ کرلیا ہے۔ انہوں نے پوری قوم سے درخواست کی کہ وہ دعاؤں میں یاد رکھیں اور بہت احتیاط کریں۔
