ایچ بی ایل پاکستان سپر لیگ نے جس طرح مقبولیت کی بلندیوں کو چھوا اسی طرح 8ویں ایونٹ کی ٹرافی آسمان کی بلندیوں سے اسٹیڈیم میں اتری۔
اے آر وائی نیوز کے مطابق دنیا کی مقبول ترین لیگ ایچ بی ایل پاکستان سپر لیگ کا آٹھواں سیزن کامیابی کے ساتھ لاہور قلندرز کی فتح پر اختتام پذیر ہوگیا۔ جس طرح اس ایونٹ نے دنیا میں مقبولیت کی بلندیوں کو چھوا ہے اسی طرح فائنل کے موقع پر اس کی ٹرافی آسمان کی بلندیوں سے قذافی اسٹیڈیم لائی گئی۔
لیجنڈری پیرا گلائیڈر آسمان کی بلندیوں سے پی ایس ایل ٹرافی ’سپر نووا‘ کو لے کر قذافی اسٹیڈیم میں اترے۔ فائنل سے قبل رنگا رنگ اختتامی تقریب بھی ہوئی۔
اس تقریب میں معروف گلوکار شفقت امانت علی نے اپنی آواز کا جادو جگایا اور اپنے مشہور نغمے گا کر شائقین کا لہو گرمایا۔
تقریب میں ڈانسرز کے گروپ نے بھی پی ایس ایل میش اپ اور سیزن 8 کے آفیشل ترانے پر ایسی جاندار پرفارمنس دی جس کو شائقین برسوں یاد رکھیں گے۔
