کوک اسٹوڈیو سیزن 14 کے بلوچ زبان کے گانے کنا یاری پر وائرل ڈانس کرنے والے گروپ دا کوئیک اسٹائل نے گانے کے گلوکار وہاب بگٹی سے ملاقات کی۔
ناروے سے تعلق رکھنے والے ڈانس گروپ دا کوئیک اسٹائل کی ایک شادی میں پرفارمنس کی ویڈیوز کچھ ماہ قبل نہایت وائرل ہوئی تھیں۔
گروپ نے کنا یاری سمیت کئی بالی ووڈ گانوں پر نہایت انوکھے رقص کا مظاہرہ کیا تھا جس کے اسٹیپس بے حد وائرل ہوئے تھے اور دنیا بھر میں لوگوں نے اس پر ویڈیوز بنائی تھیں۔
گروپ میں متنوع بیک گراؤنڈ سے تعلق رکھنے والے ڈانسرز شامل ہیں اور گروپ کے بانی کا نام سلیمان ملک ہے۔
اب اس گروپ نے دبئی میں کنا یاری کے بلوچ گلوکار وہاب بگٹی سے ملاقات کی، دبئی میں کوک اسٹوڈیو کا لائیو کنسرٹ جاری ہے جہاں وہاب بگٹی سمیت کئی گلوکار شریک ہیں۔
کوئیک اسٹائل نے اپنی انسٹاگرام اسٹوری پر وہاب بگٹی سے ملاقات کی ویڈیوز شیئر کیں، ویڈیو میں دیکھا جاسکتا ہے کہ کوئیک اسٹائل کے ڈانسرز بگٹی سے ملنے کے لیے کمرے میں داخل ہوئے تو بگٹی کو ان کے ڈانس کا بتایا گیا۔
وہاب بگٹی نے ان کے ڈانس کی بے حد تعریف کی اور کہا کہ کیا زبردست ڈانس کیا آپ نے، جبکہ ڈانسرز نے بھی ان کی آواز اور ان کے فن کو سراہا۔
View this post on Instagram
خوشگوار ماحول میں گفتگو اور تصاویر کے بعد ڈانسرز نے وہاب بگٹی سے گانے کی فرمائش کی جس پر وہاب بگٹی نے اپنے ساتھی کے ہمراہ کنا یاری گانا سنایا۔
کوئیک اسٹائل نے اپنے انسٹاگرام پر لکھا کہ وہاب بگٹی کو سننا ایک اعزاز تھا، انہوں نے کوک اسٹوڈیو کا بھی شکریہ ادا کیا جس کی وجہ سے انہیں وہاب بگٹی سے ملاقات کا موقع میسر آسکا۔
View this post on Instagram