بدلتے حالات اور سیارہ زمین کی تندرستی کے اہم اشارئیے میں ہونے والی تبدیلی کے پیش نظر ہزاروں سائنس دانوں نے آب و ہوا کی ہنگامی حالت یا کلائمٹ ایمرجنسی کے نفاذ کا مطالبہ کردیا۔
بین الاقوامی میڈیا کے مطابق دنیا بھر کے ہزاروں سائنس دانوں نے ایک تحقیقی مقالے میں کلائمٹ ایمرجنسی کے نفاذ کی ضرورت پر زور دیتے ہوئے کہا ہے کہ کرہِ ارض کے فطری نظاموں سے وابستہ تمام معیارات (وائٹل سائنز) روبہ زوال ہیں اور کچھ اپنی تباہی کی حد پر پہنچ چکے ہیں۔
جن میں انٹارکٹیکا اور گرین لینڈ کی برفیلی چادروں کا غیرمعمولی پگھلاؤ، مرجانی چٹانوں کی تباہی، ایمازون اور آسٹریلیا کے جنگلات میں لگنے والی خوفناک آگ شامل ہے۔
اس سے قبل 11 ہزار سائنسدانوں نے کلائمٹ ایمرجنسی کے نفاذ کا مطالبہ کیا تھا، جس کی ہزاروں سائنسدانوں کی جانب سے تائید کی گئی اور اس تحقیق میں مزید تین ہزار سائنسدانوں کی تحقیق و تصدیق شامل کرنے کے بعد کچھ تبدیلیوں کے ساتھ اسے دوبارہ شائع کیا گیا ہے۔
میڈیا رپورٹس کے مطابق کئی ممالک تین نکات پر تقریباً متفق ہوچکے ہیں، اول کاربن ڈائی آکسائیڈ کے اخراج پر بھاری ٹیکس، رکازی ایندھن (تیل، گیس اور کوئلے) پر مرحلہ وار پابندی اور
حیاتیاتی تنوع کے مقامات (مثلاً ایمیزون) کا تحفظ شامل ہے۔
ماہرین کا کہنا ہے کہ افسوس کہ 1960 خطروں سے آگاہ کرنے کے باوجود حکومت نے ہمارے تقاضوں کو پورا نہیں کیا۔
ماہرین نے کہا ہے کہ انسانی سرگرمیوں سے زمین غیرمعمولی تباہی کا شکار ہورہی ہے اور اب ہمارے پاس وقت بھی نہیں ہے کیوں کہ انسان آہستہ آہستہ تقریباً سارے وسائل ختم کرچکا ہے۔
