The news is by your side.

Advertisement

مندر سے مورتیوں کے ہار چوری: وزیر اعلیٰ سندھ کا نوٹس

کراچی: صوبہ سندھ کے شہر کوٹڑی میں مندر سے مورتیوں کے ہار چوری ہونے کے بعد وزیر اعلیٰ سندھ کی ہدایت پر مقدمہ درج کرلیا گیا، پولیس نے جیو فینسنگ شروع کردی ہے اور ملزمان کی تلاش میں چھاپے مار رہی ہے۔

تفصیلات کے مطابق کوٹڑی میں مندر سے مورتیوں کے ہار چوری ہونے پر وزیر اعلیٰ سندھ نے نوٹس لے لیا۔ وزیر اعلیٰ کی ہدایت پر ابتدائی اطلاعاتی رپورٹ (ایف آئی آر) درج کر کے جیو فینسنگ شروع کردی گئی۔

وزیر اعلیٰ سندھ کو دی گئی بریفنگ میں بتایا گیا کہ گزشتہ رات چور نے مندر کی چھت سے داخل ہو کر مورتیوں کے ہار چوری کیے، مورتیاں شوکیس میں بند تھیں جبکہ چوری ہونے والے 2 ہار چاندی کے تھے۔

بریفنگ کے مطابق دونوں ہاروں کی مالیت 40 ہزار روپے بتائی جارہی ہے، چور نے چندے کی پیٹی سے 20 ہزار روپے بھی چرائے۔ پولیس نے جیو فینسنگ شروع کی ہے اور چھاپے مار رہی ہے۔

وزیر اعلیٰ کا کہنا تھا کہ ضلعی انتظامیہ اور پولیس، مندر انتظامیہ کو کارروائی سے آگاہ کرتی رہے۔ مندروں اور اقلیتوں کا خیال رکھنا ہماری ذمہ داری ہے۔

Comments

یہ بھی پڑھیں