سابق وزیراعظم شاہد خاقان عباسی نے کہا ہے کہ 5 سال کے دوران ایوان میں جو کچھ ہوا سب کے سامنے ہے، یہ اسمبلی میرے لیے شرمندگی کا باعث رہی۔
اے آر وائی نیوز کے مطابق قومی اسمبلی اجلاس کے دوران اظہار خیال کرتے ہوئے شاہد خاقان نے کہا کہ اپوزیشن کے بغیر اسمبلی نامکمل ہوتی ہے، 5 سالوں کے دوران ایوان میں جو کچھ ہوا سب کے سامنے ہے، یہ اسمبلی میرے لیے شرمندگی کا باعث رہی۔
شاہد خاقان عباسی کا کہنا تھا کہ میں ایوان میں صرف 10 دن بات کر سکا، آخری ہفتے میں 40 بل منظور کیے گئے یہ باعث شرمندگی ہے، اسپیکرکو اس طرح کے کاموں کو روکنا چاہیے تھا۔
انھوں نے کہا کہ تاثر ہے کہ تمام اسمبلی ارکان کرپٹ ہیں، اس اسمبلی کی تنخواہ سے گاڑی کا خرچہ پورا نہیں ہوتا، گزشتہ اسپیکر نے جتنا نقصان اسمبلی کو پہنچایا کسی نے نہیں پہنچایا، یہ ایوان واحد ادارہ ہے جوعوام پرٹیکس لگاتا ہے۔
سابق وزیراعظم کا کہنا تھا کہ یہ ادارہ ٹیکس منظورنہ کرے تو مہنگائی نہیں ہوتی، سوال ہونا چاہیے عوام پر ٹیکس لگانے والے خود ٹیکس دیتے ہیں؟ نیب نے ہر سوال مجھ سے کیا سوائے یہ کہ میں نے ٹیکس دیا یا نہیں.
