اسلام آباد : چیئرمین پی ٹی آئی عمران خان کیلئے جاری کیے جانے والے تھریٹ میں جس شخص کی نشاندہی کی گئی تھی اس شخص نے میڈیا پر آکر بیان دے دیا۔
اسلام آباد میں نور رحمان کوچی نامی شخص نے پی ٹی آئی رہنما مراد سعید کے الزامات کے حوالے سے خصوصی پریس کانفرنس کی۔
نور رحمان کوچی نے بتایا کہ 18جون2022کو عمران خان کیلئے ایک تھریٹ جاری کیا گیا تھا، جس میں ایک کوچی نام کے بندے کا ذکر کیا گیا، میں وہی کوچی ہوں جس کے نام کا تھریٹ جاری کیا گیا۔
انہوں نے بتایا کہ پہلے مجھے اٹھایا گیا اور پھر معافی مانگ کر رہا کردیا گیا، مجھ سے تفتیش کی گئی، میرے فون کا فرانزک ہوا، اگر میرے خلاف ثبوت تھے تو مجھےکلیئر کیوں کیا گیا،
نوررحمان کوچی نے بتایا کہ مراد سعید نے بھی کہا تھا کہ کوچی ایک گروہ کا سرغنہ ہے، میں وہی کوچی ہوں جس کا نام مراد سعید نے لیا۔
انہوں نے کہا کہ میں نے اپنی زندگی میں کبھی مراد سعید کو سامنے سے دیکھا بھی نہیں، میراپاکستان اور افغانستان میں کاروبار ہے۔ 29تاریخ کو عمرے سے واپس آیا ہوں۔
مزید پڑھیں : عمران خان پر حملےکا خطرہ، تھریٹ الرٹ جاری
نوررحمان کوچی کا کہنا تھا کہ میں چیئرمین عمران خان، مراد سعید اور موجودہ حکومت سے پوچھتاہوں کہ کس نے تھریٹ جاری کیا، سپریم کورٹ سے مطالبہ ہے کہ اس معاملے پر آزادانہ کمیشن تشکیل دیا جائے۔
