بیجنگ: چین سے تبت کے لیے اڑان بھرنے والا تبتی طیارہ رن وے پر اچانک حادثے کا شکار ہو کر خوف ناک شعلوں میں گِھر گیا، جس کے باعث 36 مسافر زخمی ہو گئے۔
تفصیلات کے مطابق جمعرات کی صبح جنوب مغربی چین میں چونگ چنگ ژیانگبی انٹرنیشنل ایئر پورٹ پر تبت ایئر لائن کا طیارہ A319 ٹیک آف کی کوشش کرتے ہوئے رن سے اتر گیا اور اس میں آگ لگ گئی۔
چین کی سول ایوی ایشن کا کہنا ہے کہ طیارے کے پائلٹس کو گڑ بڑ محسوس ہونے پر انھوں نے طریقہ کار کے مطابق ایمرجنسی میں ٹیک آف روک لیا، تاہم طیارہ رن وے سے اترنے کی وجہ سے انجن کو نقصان پہنچا اور اس میں شدید آگ بھڑک اٹھی۔
حادثے کے بعد سامنے آنے والی ویڈیو فوٹیجز میں مسافروں کو چیختے ہوئے طیارے سے جان بچانے کے لیے بھاگتے دیکھا گیا، حکام کا کہنا ہے کہ طیارے میں عملے کے 9 ارکان سمیت 122 افراد سوار تھے، جن میں 36 مسافروں کو معمولی زخم آنے پر انھیں اسپتال منتقل کیا گیا۔
حادثے کے بعد سے چونگ چنگ ژیانگبی انٹرنیشنل ایئر پورٹ کو عارضی بند کیا گیا، اور متعدد پروازوں کو بھی منسوخ کرنا پڑا۔
تبت ایئر لائن کا یہ طیارہ چینی شہر چونگ چنگ سے تبت کے شہر نینگچی جا رہا تھا، پرواز میں اچانک فنی خرابی پیدا ہو گئی تھی، جس پر پائلٹس نے ٹیک آف روکا تو اس کوشش میں طیارہ رن وے سے اتر گیا اور اس میں آگ لگ گئی۔
طیارے کو آگ لگنے سے شدید نقصان پہنچا ہے، جائے وقوعہ پر شہریوں کے بنائے گئے ویڈیو کلپس میں ایئر بس کی بائیں جانب آگ جلتی ہوئی دکھائی دیتی ہے، آگ لگتے ہی فائر بریگیڈ کی کئی گاڑیاں جائے وقوعہ پر پہنچیں اور امدادی کارروائیاں شروع کر دیں۔
یہ واقعہ چائنا ایسٹرن ایئر لائنز کے طیارے کے مہلک حادثے کے 2 ماہ سے بھی کم وقت کے بعد پیش آیا ہے، جس کی وجہ سے سی اے اے سی نے ممکنہ حفاظتی خامیوں کو تلاش کرنے کے لیے سیکٹر بھر میں معائنہ شروع کر دیا ہے۔
